ഫിലാഡൽഫിയ: ഇന്ത്യയുടെ അറുപത്തിയാറാമത് റിപ്പബ്ലിക് ദിനാഘോഷം, മലയാളി അസോസിയേഷൻ ഓഫ് ഗ്രേറ്റർ ഫിലാഡൽഫിയ (മാപ്പ്) ആഘോഷപൂർവ്വം കൊണ്ടാടി. ജനുവരി 25-ന് ഞായറാഴ്ച വൈകുന്നേരം 4.30-ന് മാപ്പ് ഐ.സി.സി സെന്ററിൽ വച്ച് പ്രസിഡന്റ് സാബു സ്‌കറിയയുടെ അധ്യക്ഷതയിൽ നടന്ന സമ്മേളനത്തിൽ കുമാരി ഇവാഞ്ചലിൻ ജോൺ അമേരിക്കൻ ദേശീയ ഗാനവും, രാജേഷ് ജോൺ ഇന്ത്യൻ ദേശീയ ഗാവവും ആലപിച്ചു. വൈസ് പ്രസിഡന്റ് ഡാനിയേൽ പി. തോമസ് സ്വാഗതം ആശംസിച്ചു.

ഒരു നൂറ്റാണ്ടിലേറെക്കാലം ബ്രിട്ടീഷ് സാമ്രാജ്യത്വത്തിനെതിരേ പോരാടിയ സ്വാതന്ത്ര്യസമര സേനാനികളുടേയും ഇന്ത്യയുടെ സുരക്ഷയ്ക്കായി ജീവത്യാഗം ചെയ്ത ധീര ജവാന്മാരുടേയും ഓർമ്മകൾക്കു മുന്നിൽ സ്മരണാഞ്ജലി അർപ്പിച്ചുകൊണ്ടാണ് യോഗം ആരംഭിച്ചത്. പ്രസിഡന്റ് സാബു സ്‌കറിയ തന്റെ അധ്യക്ഷ പ്രസംഗത്തിൽ ഇന്ത്യയുടെ സാമ്പത്തിക-സാംസ്‌കാരിക -ശാസ്ത്ര രംഗങ്ങളിൽ കഴിഞ്ഞ 65 വർഷക്കാലമായി ഇന്ത്യ കൈവരിച്ച നേട്ടങ്ങളെക്കുറിച്ച് സംസാരിക്കുകയുണ്ടായി. സുന്ദരേശൻ ജോസഫ് (റിട്ട. ഡിവൈഎസ്‌പി, കേരളാ പൊലീസ്) റിപ്പബ്ലിക് ദിന സന്ദേശം നൽകി.

തുടർന്ന് പ്രമുഖ ഇൻഷ്വറൻസ് ആൻഡ് ഫിനാൻഷ്യൽ അഡൈ്വസർ രാകേഷ് മൊഹിന്ദ്രൂ അഫോർഡബിൾ കെയർ ആക്ടിനെക്കുറിച്ച് (ഒബാമ കെയർ) വിശദമായി സംസാരിക്കുകയും സദസ്യരുടെ ചോദ്യങ്ങൾക്ക് മറുപടി നൽകുകയും ചെയ്തു. ഫിലാഡൽഫിയയിലെ പ്രമുഖ ഗായകരായ സാബു പാമ്പാടി, അനൂപ് എന്നിവർ ഗാനങ്ങൾ ആലപിച്ചു. സെക്രട്ടറി സിജു ജോണിന്റെ കൃതജ്ഞതയോടുകൂടി യോഗം അവസാനിച്ചു. സോബി ഇട്ടി അറിയിച്ചതാണിത്.