ചുള്ളനായ കോളേജ് പ്രൊഫസറുടെ വേഷത്തിൽ മമ്മൂട്ടി എത്തുന്നു. മമ്മൂട്ടി ഇംഗ്ലീഷ് പ്രൊഫസറായി കാമ്പസ് കീഴടക്കുന്ന ഈ ചിത്രത്തിൽ സന്തോഷ് പണ്ഡിറ്റും ഒരു മികച്ച വേഷം കൈകാര്യം ചെയ്യുന്നുണ്ട്. മാസ്റ്റർ പീസ് എന്നാണ് സിനിമയുടെ പേര്. മാസ്റ്റർ ഓഫ് മാസസ് എന്നാണ് സിനിമയുടെ ടാഗ്ലൈൻ. രാജാധിരാജയ്ക്ക് ശേഷം അജയ് വാസുദേവ് സംവിധാനം ചെയ്യുന്ന ചിത്രമാണിത്.

സ്റ്റൈലിഷ് ഗെറ്റപ്പിൽ എത്തുന്ന മമ്മൂട്ടി എഡ്ഡി എന്ന കഥാപാത്രത്തെയാണ് അവതരിപ്പിക്കുന്നത്. എഡ്വേർഡ് ലിവിങ്സ്റ്റൺ എന്നാണ് മുഴുവൻ പേര്.

കുഴപ്പക്കാരായ കൊളേജ് വിദ്യാർത്ഥികൾ പഠിക്കുന്ന കൊളേജ് കാംപസിലേക്ക് അതിലേറെ കുഴപ്പക്കരാനായ പ്രൊഫസർ എത്തുമ്പോൾ ഉണ്ടാകുന്ന സംഭവങ്ങളാണ് സിനിമയുടെ പ്രമേയം. അതേ കോളജിലെ പൂർവ്വ വിദ്യാർത്ഥി കൂടിയാണ് എഡ്ഡി. അവിടെ പഠിച്ചിരുന്നപ്പോൾ ഇത്രയും പ്രശ്നക്കാരനായ ഒരു വിദ്യാർത്ഥി വേറെ ഉണ്ടായിരുന്നില്ല. ആ സ്വഭാവം അറിയാവുന്നതുകൊണ്ടുതന്നെയാണ് എഡ്ഡിയെ പ്രിൻസിപ്പൽ കോളജിലെ ഇംഗ്ലീഷ് പ്രൊഫസറായി ക്ഷണിക്കുന്നത്!

പൂനം പൂനം ബജ്വ ഈ ചിത്രത്തിൽ കോളജ് പ്രൊഫസറായി എത്തുന്നു. ഭവാനി ദുർഗ എന്ന ഐ പി എസ് ഉദ്യോഗസ്ഥയായി വരലക്ഷ്മി എത്തുമ്പോൾ ഉണ്ണി മുകുന്ദനും ഒരു പൊലീസ് ഉദ്യോഗസ്ഥനായി എത്തുന്നു.

ഗോകുൽസുരേഷ് ഗോപി, മുകേഷ്, മഖ്ബൂൽ സൽമാൻ, സിജു ജോൺ, പാഷാണം ഷാജി, ബിജു കുട്ടൻ, അർജുൻ, അശ്വിൻ, ജോഗി, ദിവ്യദർശൻ, അജ്മൽ നിയാസ്, സുനിൽ സുഗദ, കൈലാഷ്, കലാഭവൻ ഷാജോൺ, ഗണേശ് കുമാർ, ക്യാപ്റ്റൻ രാജു, ശിവജി ഗുരുവായൂർ,മഹിമ നമ്പ്യാർ തുടങ്ങി വൻതാരനിരയാണ് ചിത്രത്തിൽ അണിനിരക്കുന്നത്. ഉദയകൃഷ്ണയാണ് കഥാ രചന. വിനോദ് ഇല്ലംപിള്ളിയാണ് ഛായാഗ്രഹണം.

ബിഗ് ബജറ്റ് ചിത്രം റോയൽ സിനിമാസിന്റെ ബാനറിൽ മുൻ പ്രവാസിയായ സി.എച്ച്.മുഹമ്മദ് കോടികൾ ചെലവിട്ട് നിർമ്മിക്കുന്നു. റോയൽ സിനിമാസിന്റെ ആദ്യ ചിത്രമാണിത്. ഓണം റിലീസായി തിയേറ്ററുകളിലെത്തും.