'ഇതെന്തു ഭാവിച്ചാണ്; ഞങ്ങൾ ചെറുപ്പക്കാർക്ക് ജീവിക്കണ്ടേ; ചുള്ളൻ മമ്മൂക്ക'; ബ്ലാക്ക് ആൻഡ് വൈറ്റിലുള്ള മമ്മൂട്ടിയുടെ പുതിയ ഫോട്ടോ കണ്ട് കണ്ണുതള്ളി ആരാധകർ; ചക്രവർത്തിയെന്ന് ദുൽഖർ

തിരുവനന്തപുരം: സാമൂഹ്യ മാധ്യമങ്ങളിൽ തരംഗമായി മമ്മൂട്ടിയുടെ അതീവ സ്‌റ്റൈലിഷ് ലുക്കിലുള്ള പുതിയ ചിത്രം. മമ്മൂട്ടി ഇൻസ്റ്റഗ്രാമിൽ പങ്കുവെച്ച ഫോട്ടോയാണ് സമൂഹമാധ്യമങ്ങളിൽ വൈറലാകുന്നത്. ബ്ലാക്ക് ആൻഡ് വൈറ്റിലുള്ള ചിത്രം ആരാധകരുടെ മാത്രമല്ല സിനിമാ താരങ്ങളുടേയും മനസു കീഴടക്കുകയാണ്.

വെള്ള ടീ ഷർട്ടും പാന്റും ധരിച്ച് ചുമരിൽ ചാരി നിൽക്കുന്ന മമ്മൂട്ടിയാണ് ചിത്രത്തിൽ. താടിയും മുടിയും വളർത്തിയ ലുക്കിലാണ് താരമെത്തുന്നത്. ബ്ലാക്ക് ആൻഡ് വൈറ്റ് എന്ന അടിക്കുറിപ്പിലാണ് ചിത്രം മമ്മൂട്ടി പങ്കുവെച്ചത്. സെലിബ്രിറ്റി ഫോട്ടോഗ്രാഫറായ ഷാനി ഷാകിയാണ് ചിത്രം പകർത്തിയത്.

ചിത്രം ബ്ലാക്ക് ആൻഡ് വൈറ്റ് ആണെകിലും ഇത് കണ്ടപ്പോൾ ഇന്നത്തെ ദിവസം കളർ ആയി എന്ന് തുടങ്ങുന്ന കമെന്റുകളാണ് വരുന്നത്. ഒപ്പം ദുൽഖറും രംഗത്ത് എത്തി. ചക്രവർത്തി എന്നാണ് വാപ്പിച്ചിയുടെ ചിത്രത്തിന് ദുൽഖർ കുറിച്ചത്.

എങ്ങനെയാണ് അദ്ദേഹം ചെറുപ്പമായിരിക്കുന്നത് എന്നായിരുന്നു പൃഥ്വിരാജിന്റെ കമന്റ്. കൂട്ടത്തിൽ ഗായകൻ വിജയ് യേശുദാസിന്റെ കമന്റാണ് ചിരിയുണർത്തുന്നത്. 'ഇങ്ങേരുടെ ഒരു കാര്യം, നമ്മളൊക്കെ വെറുതെ' എന്നാണ് വിജയ് യേശുദാസ് പറയുന്നത്.

രസകരമായ കമന്റുകളുമായി ആരാധകരും എത്തുന്നുണ്ട്. 'അറിയാത്തതു കൊണ്ട് ചോദിക്കുവാ ഇതെന്തു ഭാവിച്ചാണ് ഞങ്ങൾ ചെറുപ്പക്കാർക്ക് ജീവിക്കണ്ടേ ചുള്ളൻ മമ്മൂക്ക' എന്നാണ് മറ്റൊരു കമന്റ്. എന്തായാലും ആരാധകർ ചിത്രം ആഘോഷമാക്കുകയാണ്. പ്രായം കൂടും തോറും സൗന്ദര്യം കൂടി വരുന്ന ഒരു അപൂർവ്വയിനം മനുഷ്യൻ എന്നാണ് മറ്റൊരു കമന്റ്.