ഉത്സവകാലത്തും കോവിഡ് സുരക്ഷ മാനദണ്ഡങ്ങളിൽ വീഴ്‌ച്ച വരുത്തരുത്; മൻ കി ബാത്തിൽ നരേന്ദ്ര മോദി; ലോദ നദീദിനത്തിൽ നദീ സംരക്ഷണ പ്രവർത്തകർക്കും ആദരം
ന്യൂഡൽഹി: ഉത്സവകാലത്ത് കോവിഡ് സുരക്ഷാ മാനദണ്ഡങ്ങൾ പാലിക്കണമെന്ന് അഭ്യർത്ഥിച്ചും ശുചിത്വത്തിന്റെ പ്രാധാന്യത്തെ കുറിച്ച് ഓർമിപ്പിച്ചും പ്രധാനമന്ത്രി നരേന്ദ്ര മോദി. റേഡിയോ പ്രഭാഷണ പരിപാടി മൻ കി ബാത്തിന്റെ 81-ാം അധ്യായത്തിലാണ് മോദിയുടെ പരാമർശം.
ഉത്സവങ്ങൾ അടുത്തുകൊണ്ടിരിക്കുകയാണ്. കോവിഡിന് എതിരായ പോരാട്ടം നമുക്ക് തുടർന്നേ മതിയാകൂ. അന്താരാഷ്ട്ര തലത്തിൽ വാക്സിനേഷനിൽ റെക്കോഡ് സൃഷ്ടിച്ചത് ഉൾപ്പെടെ 'ടീം ഇന്ത്യ' ഓരോ ദിവസവും പുതിയ റെക്കോഡുകൾ സൃഷ്ടിക്കുകയാണ്. ആരും 'സുരക്ഷാ ചക്ര' ഉപേക്ഷിക്കരുത്. പ്രോട്ടോക്കോൾ പാലിക്കണം- മോദി പറഞ്ഞു.
ലോക നദീദിനമായ ഇന്ന്, നദീസംരക്ഷണത്തെ കുറിച്ചും മോദി മൻ കീ ബാത്തിൽ പരാമർശിച്ചു. നദീസംരക്ഷണത്തിന് മുന്നിട്ടിറങ്ങിയവരെ അദ്ദേഹം അഭിനന്ദിച്ചു. തമിഴ്‌നാട്ടിലെ നാഗാ നദി വരണ്ടുണങ്ങിപ്പോയിരുന്നു. എന്നാൽ, ഗ്രാമീണവനിതകളുടെ ശ്രമഫലമായും പൊതുജനങ്ങളുടെ സഹകരണം കൊണ്ടും നദിക്ക് ജീവൻതിരികെ ലഭിച്ചു. ഇന്ന് ആ നദിയിൽ ധാരാളം ജലമുണ്ട്- പ്രധാനമന്ത്രി പറഞ്ഞു. പ്രാദേശിക ഉത്പന്ന നിർമ്മാതാക്കളെ സഹായിക്കാൻ ഖാദി ഉത്പന്നങ്ങൾ വാങ്ങണമെന്നും മോദി ജനങ്ങളോട് അഭ്യർത്ഥിച്ചു.
