മലപ്പുറം: മലപ്പുറം കൊണ്ടോട്ടി പള്ളിക്കൽ പഞ്ചായത്ത് പ്രസിഡന്റായിരുന്ന പി.കെ. മുഹമ്മദ്കുട്ടിയുടെ മകനും മരുമകളും ഭീകര സംഘടനയായ ഐ.എസിലേക്കു ആകൃഷ്ടരായി പോയത് എട്ടുവർഷം മുമ്പാണ്. നിലവിൽ ഐ.എസിൽചേർന്ന് കൊല്ലപ്പെട്ട മലയാളികളുടെ ലിസ്റ്റിൽ മലപ്പുറത്തെ ഈ മുൻപഞ്ചായത്ത് പ്രസിഡന്റിന്റെ മകനും മരുമകളുമുണ്ട്. എന്നാൽ ഇക്കാര്യം ബന്ധുക്കൾ വിശ്വസിക്കുന്നില്ല.

പലപ്പോഴും ഐ.എസിൽചേർന്നുകൊല്ലപ്പെട്ടന്നു വിവരം ലഭിക്കുന്നവർ വീണ്ടും ജീവനോടെയുണ്ടാകുന്നതു വാർത്തയായി വരാറുണ്ട്. ഇതിനാൽ തന്നെ ഇവർ ജീവനോടെയുണ്ടെന്നു വിശ്വസിക്കുകയാണ് വീട്ടുകാർ. ഇതു സംബന്ധിച്ചു നേരത്തെ കേരളത്തിലെ എൻ.ഐ.എ മേധാവിയുമായി നിരവധി തവണ മുഹമ്മദ്കുട്ടി ബന്ധപ്പെടാറുണ്ടായിരുന്നു. തന്റെ മകനെ കുറിച്ചുള്ള വിവരങ്ങൾ അന്വേഷിച്ചായിരുന്നു ഫോൺ വിളികൾ.

മലപ്പുറം കൊണ്ടോട്ടി പള്ളിക്കൽ പഞ്ചായത്ത് പ്രസിഡന്റായിരുന്ന പി.കെ. മുഹമ്മദ്കുട്ടിയുടെ മകൻ മൻസൂറലിയും ഭാര്യയും ബി.ടെക്കുകാരിയായ സബ്ഹ ഐ.എസിലെത്തിയെന്നും തുടർന്ന് മൻസൂറലി സഖ്യസേനയുമായുള്ള യുദ്ധത്തിൽ കൊല്ലപ്പെട്ടുവെന്നുമാണ് അന്വേഷണ ഏജന്റസികൾക്ക് ലഭിച്ച വിവരം. എന്നാൽ ഇരുവരും ഇവരുടെ 2 ചെറിയ കുഞ്ഞുങ്ങളേയും കൂട്ടിയാണ് പോയത്. ഈ കുട്ടികൾ എവിടെയെന്നതാണ് വലിയ ചോദ്യചിഹ്നമായി നിൽക്കുന്നത്. നാട്ടിലെ പ്രമുഖ കുടുംബത്തിൽ നടന്ന ഒരു ഐ.എസ് ദുരന്തകഥ ഇങ്ങിനെയാണ്.

ഇരുവരുടേയും തിരോധനത്തെ തുടർന്ന് പലതവണ സംസ്ഥാനപൊലീസും കേന്ദ്ര അന്വേഷണ ഏജൻസികളും കൊണ്ടോട്ടി പാലപ്പെട്ടിയിലെ ഇവരുടെ വീട്ടിൽ വരികയും മാതാപിതാക്കളുടേയും ബന്ധുക്കളുടേയും മൊഴിയെടുക്കുകയും ചെയ്തിരുന്നു. ഇതിനിടയിൽ സബ്ഹയും മരണപ്പെട്ടതായി ചില മെസ്സേജുകൾ വന്നു. 2005-06 വർഷം തൃശൂർ എൻജിനിയറിങ് കോളജിൽ പഠനം നടത്തിയ മൻസൂറലി പിന്നീട് ഡൽഹിയിൽ റിലയൻസ് കമ്പനിയിൽ ഇലക്ട്രിക്കൽ മാനേജരായി ജോലിചെയ്തു വരികയായിരുന്നു. തുടർന്ന് ആറുവർഷം മുമ്പ് ജോലികിട്ടി ബഹ്െറെനിലേക്കു പോയി. പിന്നീട് നാട്ടിലേക്ക് തിരിച്ചുവന്നിട്ടില്ല.ബഹറൈനിൽനിന്നും 2014ലാണ് ഐ.എസ് ആശയത്തിൽ ആകൃഷ്ടനായി പോയത്.

എൻ.ഐ.എ. റിപ്പോർട്ടിനെത്തുടർന്നു ആദ്യം സംസ്ഥാന സ്പെഷൽ ബ്രാഞ്ച് മൂൻസൂറലിയുടെ വീട്ടിലെത്തി മൊഴിയെടുത്തിരുന്നു. എന്നാൽ, യുവാവ് മരണമടഞ്ഞതായ വിവരമൊന്നും അറിഞ്ഞിട്ടില്ലെന്നാണു വീട്ടുകാർ പറഞ്ഞത്. വീട്ടുകാരുമായും ബന്ധുക്കളുമായൊന്നും യുവാവ് വലിയ അടുപ്പമൊന്നും പുലർത്താറില്ലായിരുന്നുവെന്ന് പറയുന്നു. ഇയാൾ അവസാനമായി വിളിച്ചതുകൊല്ലപ്പെട്ടതായി വിവരം ലഭിച്ചതിന്റെ പത്തുമാസം മുമ്പാണെന്നാണ് മൊഴിയെടുക്കാനെത്തിയപ്പോൾ വീട്ടുകാർ പറഞ്ഞത്.

ഒരു വർഷത്തെ ഇടവേളയ്ക്ക് ശേഷമായിരുന്നു ആ ഫോൺ വിളി. ബഹറൈനിലേക്ക് ജോലി ആവശ്യാർഥം ഇരുവരും ആദ്യംപോകുമ്പോൾ ഒരുകുഞ്ഞായിരുന്നു ഉണ്ടായിരുന്നത്. തുടർന്ന് മറ്റൊരു കുഞ്ഞുകൂടി ഇവർക്ക് ബഹറൈനിൽവെച്ച് പ്രസവിച്ചു. കുഞ്ഞുങ്ങളേയും കൂട്ടിയാണ് ഇരുവരും പോയതെന്നാണ് വിവരം. എന്നാൽ കുഞ്ഞുങ്ങളെ കുറിച്ചുള്ള മറ്റു വിവരങ്ങളൊന്നും ബന്ധുക്കൾക്കും രഹസ്യാന്വേഷണ വിഭാഗങ്ങൾക്കും ലഭിച്ചില്ല. ഈസമയത്ത് മൻസൂറലിയുടെ ഭർതൃപിതാവും ബഹറൈനിൽ ജോലി ചെയ്തിരുന്നു.

നാട്ടിലെ അറിയപ്പെടുന്ന കുടുംബാംഗമാണ് മൻസൂറലി, സഹോദരൻ നേരത്തെ നെടുമ്പാശേരി വിമാനത്തവളത്തിൽ ജോലിചെയ്തിരുന്നു. അതേ സമയം മകനെ കുറിച്ചുള്ള വിവരങ്ങളെ കുറിച്ച് ഇപ്പോൾ യാതൊരു വിവരമില്ലെങ്കിലും തിരിച്ചുവരുമെന്ന പ്രതീക്ഷയുണ്ടെന്നും മുൻപഞ്ചായത്ത് പ്രസിഡന്റ്കൂടിയായിരുന്ന മൻസൂറലിയുടെ പിതാവ് പി.കെ. മുഹമ്മദ്കുട്ടി പറഞ്ഞു.

മരണപ്പെട്ടതായി വിശ്വസിക്കുന്നില്ലെന്നും മകനെ കുറിച്ചുള്ള വിവരങ്ങൾ അന്വേഷണിച്ച് വിവിധ അന്വേഷണ ഉദ്യോഗസ്ഥരുമായി ബന്ധപ്പെട്ടിരുന്നതായും അദ്ദേഹം നേരത്തെ പ്രതികരിച്ചിരുന്നു. 

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍