മാപ്പ് ഓണാഘോഷം: ഒരുക്കങ്ങൾ പൂർത്തിയായി

ഫിലാഡൽഫിയ: മലയാളി അസോസിയേഷൻ ഓഫ് ഗ്രേറ്റർ ഫിലാഡൽഫിയയുടെ 35-മത് ഓണാഘോഷപരിപാടികളുടെ ഒരുക്കങ്ങൾ പൂർത്തിയായി. ആറിന് ശനിയാഴ്ച രാവിലെ 10.30 മുതൽ 4 മണി വരെ ഫിലാഡൽഫിയയിലെ അസൻഷൻ മാർത്തോമാ ചർച്ച് ഓഡിറ്റോറിയത്തിൽ (10197 Northeast Ave, Philadelphia, PA 19116) വച്ച് നടക്കുന്ന ഓണാഘോഷ പരിപാടിയിൽ പഞ്ചവാദ്യമേളങ്ങളും താലപ്പൊലിയേന്തിയ യുവതികളുടെ അകമ്പടിയോടെയുള്ള മാവേലി മന്നന്റെ എഴുന്നള്ളത്തും, പൊതുസമ്മേളനവും, വിഭവസമൃദ്ധമായ ഓണസദ്യയും, വിവിധ കേരളത്തനിമയുള്ള കലാപരിപാടികളും ഉണ്ടായിരിക്കുന്നതാണ്.

പൊതുസമ്മേളനത്തിൽ ന്യൂയോർക്കിൽ നിന്നുള്ള പ്രൊഫ. ജോയ് ടി. കുഞ്ഞാപ്പു DSC Phd, ഫ്‌ളോറിഡയിൽ നിന്നും ആനന്ദൻ നിരവേൽ (ഫോമാ ഇലക്ടഡ് പ്രസിഡന്റ് 2015-16), കേരളത്തിൽ നിന്നും ഷാജി കറ്റാനം (ആലപ്പുഴ ഡി.സി.സി സെക്രട്ടറി), രാജു മൈലപ്ര (ന്യൂയോർക്ക്), റവ.ഫാ. ജേക്കബ് ജോൺ എന്നിവരെ കൂടാതെ ട്രൈസ്റ്റേറ്റ് ഏരിയയിൽ നിന്നുള്ള എല്ലാ മലയാളി സംഘടനാ നേതാക്കളും ഈ പരിപാടിയിൽ സംബന്ധിക്കുന്നതാണ്.

ആർട്‌സ് ചെയർപേഴ്‌സൺ സോയാ നായരുടെ നേതൃത്വത്തിൽ കേരളത്തിന്റെ തനതായ തിരുവാതിരകളി, ഓട്ടൻതുള്ളൽ, ഓണപ്പാട്ടുകൾ, ഫിലാഡൽഫിയയിലെ പ്രമുഖ നൃത്തസംഘങ്ങളുടെ നൃത്തവിരുന്നും ഉൾക്കൊള്ളുന്ന കലാപരിപാടികളുടെ ഒരുക്കങ്ങളും പൂർത്തിയായിക്കഴിഞ്ഞു.

അതിമനോഹരമായി കേരളത്തിൽ നിന്നും അച്ചടിച്ചു തയാറാക്കിയ സുവനീർ, അവാർഡ് സെറിമണി എന്നിവ ഈ വർഷത്തെ ഓണാഘോഷപരിപാടികൾക്ക് മാറ്റുകൂട്ടുന്നു. പ്രസിഡന്റ് സാബു സ്‌കറിയയുടെ നേതൃത്വത്തിൽ രൂപീകരിച്ച വിപുലമായ കമ്മിറ്റി വളരെയധികം ആത്മാർത്ഥതയോടുകൂടി ഓണാഘോഷപരിപാടികളുടെ വിജയത്തിനായി പ്രവർത്തിക്കുന്നു.

തുമ്പയും മുക്കുറ്റിയും ചെത്തിയും മന്ദാരവും പൂക്കളത്തിൽ അണിചേരുവാൻ കാത്തുനിൽക്കുന്ന ഈ പൊന്നോണ മാസത്തിൽ മലയാളി അസോസിയേഷൻ ഓഫ് ഗ്രേറ്റർ ഫിലാഡൽഫിയയുടെ ഓണാഘോഷപരിപാടികളിലേക്ക് അമേരിക്കയിലെ എല്ലാ മലയാളി സുഹൃത്തുക്കളേയും ഭാരവാഹികൾ കുടുംബസമേതം സ്വാഗതം ചെയ്യുന്നതായി അറിയിച്ചു.

കൂടുതൽ വിവരങ്ങൾക്ക്: സാബു സ്‌കറിയ (267 980 7923), തോമസ് എം. ജോർജ് (215 620 0323), ജോൺസൺ മാത്യു (215 740 9486), ഷാജി ജോസഫ് (267 372 2521), ഐപ് ഉമ്മൻ മാരേട്ട് (267 688 4500), സോയ നായർ (267 229 9449). യോഹന്നാൻ ശങ്കരത്തിൽ അറിയിച്ചതാണിത്.