തിരുവനന്തപുരം: മുന്ന് പതിറ്റാണ്ടായി മോഹൻലാൽ മലയാളികളുടെ പ്രിയങ്കരനായ നടനായി മാറിയിട്ട്. മലയാളികളും അല്ലാതെയുമായി നിരവധി പേരുടെ നായകനായും അദ്ദേഹം അഭിനയിച്ചിട്ടുണ്ട്. ഇപ്പോഴും പുതുമുഖ നായികമാർക്കൊപ്പം അഭിനയം സജീവമായി കൊണ്ടുപോകുന്നു. ഇക്കാലയളവിനിടെ നിരവധി വിമർശനങ്ങളും അദ്ദേഹം കേൾക്കേണ്ടി വന്നിട്ടുണ്ട്. എന്നാൽ, ഒരിക്കും ഈ വിമർശനങ്ങൾ കേട്ട് അതിൽ ദുഃഖിച്ചിരിക്കാൻ അദ്ദേഹം തയ്യാറായിട്ടില്ല.

പതിറ്റാണ്ടായി സിനിമ രംഗത്ത് നിൽക്കുമ്പോൾ ഇത്തരം പല തിക്താനുഭവങ്ങളുമുണ്ടാകുന്നതു സ്വാഭാവികമെന്നു വിശ്വസിക്കാൻ ഇഷ്ടപ്പെടുന്ന ആളാണ് ലാൽ. അടുത്തിടെ ഒരു വനിതാ പ്രസിദ്ധീകരണത്തിന് നിൽകിയ അഭിമുഖത്തിൽ മോഹൻലാലിനോട് ഒരു ചോദ്യം ഉയർന്നു. എന്തുകൊണ്ടാണ് മകളേക്കാൾ പ്രായം കുറഞ്ഞ പെൺകുട്ടികളുടെ കാമുക വേഷത്തിൽ അഭിനയിക്കുന്നു എന്നതായിരുന്നു ചോദ്യം.

അഭിനയിക്കുന്നത് പ്രായത്തിനൊത്ത കഥാപാത്രങ്ങളെ സ്വീകരിക്കാനുള്ള വൈമുഖ്യം കൊണ്ടല്ലേ എന്നും ചോദ്യമുയർന്നു. ഇതിന് അദ്ദേഹം നൽകിയ മറുപടിയും കിടിലനായിരുന്നു. ലാൽ നൽകിയ മറുപടി ഇങ്ങനെയായിരുന്നു: '' സിനിമയിൽ പണ്ടു മുതലേ നായകന്മാർ പ്രായമായാലും ചെറുപ്പക്കാരികളായ നായികമാർക്കൊപ്പമഭിനയിക്കും. ലോകത്ത് മുഴുവൻ അങ്ങനെയാണ്. പക്ഷേ കഴിഞ്ഞ കുറേ വർഷമായി അങ്ങനെ ചെറുപ്പക്കാരികളുടെ നായകനായി ഞാനഭിനയിച്ചത് ഏതു സിനിമയാണെന്നു പോലുമറിയില്ല''.

പത്തുനാൽപതു കൊല്ലമായി സിനിമയിൽ നിൽക്കുന്ന ഒരാളെപ്പറ്റി പറയുമ്പോൾ അയാൾ അത്തരം ആരോപണങ്ങളിൽക്കൂടി സഞ്ചരിക്കണം. അല്ലെങ്കിൽ പിന്നെ എന്താ രസം? ഞാനൊരിക്കൽ നമ്മുടെ മധുസാറുമായി സംസാരിക്കുകയായിരുന്നു. അപ്പോൾ ഈ കാര്യം ഞാൻ സാറിനോടു ചോദിച്ചു. അപ്പോൾ സാർ പറഞ്ഞു, ''എടോ, നമ്മുടെ ജീവിതത്തിൽ അങ്ങനെയും ചിലതൊക്കെ വേണ്ടേ? വിമർശനങ്ങളും ആക്ഷേപങ്ങളും ഒക്കെ ഓരോ ഘട്ടങ്ങളല്ലേ?''.