കന്നഡ സിനിമാപ്രേമികളെ സംബന്ധിച്ച് ഏറെ പ്രത്യേകതകളുള്ള ഒരു ചിത്രം നാളെ തിയറ്ററുകളിൽ എത്തുകയാണ്. അകാലത്തിൽ തങ്ങളെ വിട്ടുപിരിഞ്ഞ പ്രിയതാരം പുനീത് രാജ്കുമാർ അവസാനമായി അഭിനയിച്ച ജെയിംസ് ഇന്ന് തിയറ്ററുകളിൽ എത്തുകയാണ്. പുനീതിന്റെ പിറന്നാൾ ദിനത്തിൽ തന്നെ ചിത്രം തിയറ്ററുകളിൽ എത്തിക്കണമെന്ന അണിയറക്കാരുടെ ആഗ്രഹം പ്രാവർത്തികമായിരിക്കുകയാണ്. ഇപ്പോഴിതാ ചിത്രത്തിന് എല്ലാ വിധ ആശംസകളും നേർന്ന് എത്തിയിരിക്കുകയാണ് മോഹൻലാൽ മോഹൻലാലിന് അടുത്ത വ്യക്തിബന്ധമുള്ള ആളായിരുന്നു പുനീത്.

പ്രിയ പുനീത്, നിങ്ങളുടെ ചിത്രം ജെയിംസ് ഒരു ഗംഭീര സിനിമയായിരിക്കുമെന്ന് എനിക്ക് ഉറപ്പുണ്ട്. ഞങ്ങളുടെയെല്ലാം ഹൃദയങ്ങളിൽ ഈ ചിത്രത്തിന് ഒരു പ്രത്യേക സ്ഥാനം ഉണ്ടായിരിക്കും. ഞങ്ങൾക്ക് നിങ്ങളെ മിസ് ചെയ്യുന്നു, ജെയിംസിന്റെ റിലീസ് പോസ്റ്ററിനൊപ്പം മോഹൻലാൽ സോഷ്യൽ മീഡിയയിൽ കുറിച്ചു.

ആക്ഷൻ രംഗങ്ങൾക്ക് പ്രാധാന്യം നൽകി ഒരുക്കിയിരിക്കുന്ന ചിത്രമാണിത്. പ്രിയ ആനന്ദ്, മേക ശ്രീകാന്ത്, അനു പ്രഭാകർ മുഖർജി എന്നിവർ പ്രധാന കഥാപാത്രങ്ങളായി ചിത്രത്തിൽ എത്തുന്നുണ്ട്. പുനീതിന്റെ സഹോദരങ്ങളായ രാഘവേന്ദ്ര രാജ്കുമാറും ശിവരാജ്കുമാറും ചിത്രത്തിൽ സാന്നിധ്യങ്ങളാവും. മൂന്ന് സഹോദരങ്ങളെയും ഒരു ഫ്രെയ്മിൽ കാണാൻ കന്നഡ സിനിമാപ്രേമികളുടെ ദീർഘനാളായുള്ള ആഗ്രഹവും കാത്തിരിപ്പുമാണ്. ചിത്രത്തിന് കർണ്ണാടകയിൽ ഒരാഴ്ച സോളോ റൺ ആണ്. പുനീതിനോടുള്ള ആദരസൂചകമെന്ന നിലയ്ക്ക് കർണ്ണാടകയിലെ ചലച്ചിത്ര വിതരണക്കാർ ഒരാഴ്ചത്തേക്ക് മറ്റു സിനിമകൾ റിലീസ് ചെയ്യില്ല.

സൈനികനായി പുനീത് എത്തുന്ന സിനിമ ആക്ഷന് പ്രാധാന്യം നൽകി ചെയ്ത മാസ് എന്റർടെയ്‌നറാണ്. ഒരു പാട്ടും ആക്ഷൻ സീക്വൻസും ഒഴികെയുള്ള പ്രധാന ഭാഗങ്ങളെല്ലാം ചിത്രീകരിച്ച ശേഷമായിരുന്നു പുനീത് വിടപറഞ്ഞത്. നാലായിരത്തിലധികം സ്‌ക്രീനുകളിലാണ് ജെയിംസ് റിലീസ് ചെയ്യുക. ഒരു കന്നഡ ചിത്രത്തിന്റെ റെക്കോർഡ് സ്‌ക്രീനിംഗാണ് 'ജെയിംസി'ന് ലഭിക്കുന്നത്. ദിവസങ്ങൾക്ക് മുൻപ് ആരംഭിച്ച അഡ്വാൻസ് ബുക്കിംഗിൽ ചിത്രത്തിന് വൻ പ്രതികരണമാണ് ലഭിക്കുന്നത്. ബംഗളൂരുവിൽ 600ൽ ഏറെ പ്രദർശനങ്ങളിൽ നിന്നുമായി 2.64 കോടി രൂപയാണ് അഡ്വാൻസ് ബുക്കിങ് കളക്ഷൻ. മൈസൂരുവിൽ നിന്ന് 77 ഷോകളിൽ നിന്നായി 44 ലക്ഷം രൂപയും ലഭിച്ചതായി അറിയുന്നു.

കിഷോർ പതികൊണ്ടയാണ് ചിത്രം നിർമ്മിക്കുന്നത്. കിഷോർ പ്രൊഡക്ഷൻസിന്റെ ബാനറിലാണ് നിർമ്മാണം. ചരൺ രാജ് ചിത്രത്തിന്റെ സംഗീത സംവിധാനം നിർവഹിക്കുന്നു. ദീപു എസ് കുമാറാണ് ചിത്രസംയോജനം നിർവഹിക്കുന്നത്. രചനയും സംവിധാനവും ചേതൻ കുമാർ. അരുൺ പ്രഭാകർ, ശ്രീകാന്ത്, ആർ ശരത്കുമാർ ഹരീഷ് പേരടി, തിലക് ശേഖർ, മുകേഷ് ഋഷി, ആദിത്യ മേനോൻ, രംഗയാന രഘു, അവിനാശ്, സധു കോകില, ചിക്കണ്ണ, സുചേന്ദ്ര പ്രസാദ് തുടങ്ങിയവർ അഭിനയിച്ചിരിക്കുന്നു.

 

മറുനാടന്‍ മലയാളി

    മറുനാടന്‍ മലയാളി ബ്യൂറോ