തിരുവനന്തപുരം: ആരാധകരുമായി അടുത്തിടപഴകുന്നതിൽ ഒട്ടും മടികാണിക്കാത്ത സൂപ്പർ സ്റ്റാർ മോഹൻലാൽ തന്റെ കവിളിൽ ആരാധനമൂത്തു ചുംബിക്കാൻ ശ്രമിച്ചയാളെ തള്ളിമാറ്റുന്ന വീഡിയോ സോഷ്യൽ മീഡിയയിൽ വൈറലാകുന്നു. ലാലിനൊപ്പം നിന്നു ഫോട്ടോ എടുക്കാൻ ശ്രമിക്കുന്നതിനിടെയായിരുന്നു സംഭവം. ആരാധകനെ തള്ളിമാറ്റുന്നതും അനിഷ്ടം പ്രകടിപ്പിക്കുന്നതും വീഡിയോയിൽ കാണാം.

മോഹൻലാൽ ആരാധകരെ കെട്ടിപ്പിടിക്കുകയും ഉമ്മവയക്കാറുണ്ടെന്ന് പറയുകയും ചെയ്യുന്ന ആരാധകർ എവിടെപ്പോയെന്ന ചോദ്യമാണ് വീഡിയോ ഉന്നയിക്കുന്നത്. 'ഇതാണോ മോഹൻലാലിന്റെ ആരാധക സ്നേഹം, കഷ്ടം' എന്ന തലവാചകത്തിലാണ് വീഡിയോ പ്രചരിക്കുന്നത്. വിദേശത്തെ ഒരു പരിപാടിക്കിടെയാണ് സംഭവം നടന്നിരിക്കുന്നത്. മോഹൻലാൽ ആരാധകർക്കെതിരെയും മോഹൻലാലിനെതിരെയും പോസ്റ്റിന് താഴെ കളിയാക്കലുകളും ചീത്തവിളികളും കുമിഞ്ഞുകൂടുകയാണ്.

മോഹൻലാലിന്റെ വീഡിയോയ്ക്കൊപ്പം തന്നെ മമ്മുട്ടി ആരാധകരെ ചേർത്ത് നിറുത്തി എടുത്ത ചിത്രങ്ങളും പ്രചരിക്കുന്നുണ്ട്. ബി ഉണ്ണികൃഷ്ണൻ ചിത്രത്തിലെ കഥാപാത്രത്തിന്റെ രൂപത്തിലാണ് മോഹൻലാൽ. അധിക കാലം പഴക്കമില്ല വീഡിയോയ്ക്കെന്ന് വ്യക്തം. വീഡിയോ ഇതിനകം നിരവധിപ്പേർ ഷെയർ ചെയ്തു കഴിഞ്ഞു.