തെന്നിന്ത്യൻ സിനിമ ഉപേക്ഷിക്കാനുള്ള കാരണം മലയാളത്തിലെ ആ യുവനടൻ; പ്രണയ പരാജയം തുറന്ന് പറഞ്ഞ് നടി മോണൽ ഗജ്ജർ
തെന്നിന്ത്യൻ സിനിമ ഉപേക്ഷിക്കാനുള്ള കാരണം പ്രണയ പരാജയമെന്ന് നടി മോണൽ ഗജ്ജർ. മലയാള നടനുമായുള്ള പ്രണയപരാജയമാണ് താൻ ദക്ഷിണേന്ത്യൻ സിനിമകൾ വേണ്ടെന്ന് വെക്കാനുള്ള കാരണമെന്നാണ് താരം വെളിപ്പെടുത്തുന്നത്. ബിഗ് ബോസ് തെലുങ്ക് പതിപ്പിൽ നിന്നും പുറത്തായ ശേഷം താരം മാധ്യമങ്ങൾക്കു നൽകിയ അഭിമുഖത്തിലാണ് ഇക്കാര്യം വെളിപ്പെടുത്തിയത്. ബിഗ് ബോസിൽ നിന്നും തിരികെ വന്നതിന് ശേഷം എന്തിനാണ് തെന്നിന്ത്യയെ ഉപേക്ഷിച്ചതെന്ന ചോദ്യത്തിനാണ് തന്റെ പ്രണയ പരാജയമായിരുന്നു ഇതിന് കാരണമെന്ന് താരം വ്യക്തമാക്കിയത്.
‘മലയാളത്തിലെ യുവനടനുമായി കടുത്ത പ്രണയത്തിലായിരുന്നു. എന്നാൽ കാര്യങ്ങൾ നല്ല രീതിയിൽ മുന്നോട്ടു പോയില്ല. ഞങ്ങൾ പിരിഞ്ഞു. എന്നാൽ ആ വേർപിരിയൽ ജീവിതത്തിൽ മറക്കാൻ പറ്റാത്ത ഒന്നായിരുന്നു. അതോടെ തെന്നിന്ത്യൻ സിനിമകളിൽ അഭിനയിക്കേണ്ടെന്നു തീരുമാനിച്ചു.'–മോണൽ ഗജ്ജർ പറഞ്ഞു. ബിഗ് ബോസ് തെലുങ്ക് നാലാം പതിപ്പിലെ പുതിയ സീസണിലൂടെ നടി വീണ്ടും പ്രേക്ഷക ശ്രദ്ധനേടി. പരിപാടി ഹിറ്റായതോടെ നടിയെ തേടി നിരവധി അവസരങ്ങളാണ് സിനിമാ–സീരിയൽ രംഗത്തുനിന്നും വരുന്നത്. കഴിഞ്ഞ ആഴ്ച നടി പരിപാടിയിൽ നിന്നും പുറത്താകുകയുണ്ടായി.
2012 ൽ സിനിമയിലെത്തിയ മോണൽ ഗജ്ജർ 2014–വരെ തെലുങ്ക്, തമിഴ്, മലയാളം തുടങ്ങി തെന്നിന്ത്യൻ സിനിമകളിലാണ് അഭിനയിച്ചിരുന്നത്. നടിയുടെ അരങ്ങേറ്റ ചിത്രവും തെലുങ്കിൽ സൂപ്പർഹിറ്റായി. അഞ്ച് വർഷം അഭിനയത്ത് സജീവമായ താരം പെട്ടെന്ന് സൗത്ത് ഇന്ത്യൻ സിനിമകൾ ഉപേക്ഷിച്ച് ഗുജറാത്തിലേക്ക് പോയി. 2018 മുതൽ നടി ഗുജറാത്തി സിനിമകളിൽ മാത്രമാണ് പ്രത്യക്ഷപ്പെട്ടത്.
വിനയൻ സംവിധാനം ചെയ്ത ഡ്രാക്കുള 2012 എന്ന ചിത്രത്തിലൂടെയാണ് നായികയായി മോണൽ ഗജ്ജർ മലയാളത്തിലേക്ക് എത്തുന്നത്. സുധീർ നായകനായി അഭിനയിച്ച ചിത്രത്തിൽ മോണലിന്റെ വേഷം ശ്രദ്ധിക്കപ്പെട്ടിരുന്നു. 2017ൽ തെലുങ്കിൽ റിലീസ് ചെയ്ത ദേവദാസിയാണ് നടി അവസാനം അഭിനയിച്ച തെന്നിന്ത്യൻ ചിത്രം.
