പ്രേക്ഷകരുടെ പൾസ് അടുത്തറിഞ്ഞ മനസ്സ്; സാന്ത്വനവും വാനമ്പാടിയും ആകാശദൂതും ടെലിവിഷൻ റേറ്റിംഗിലെ സൂപ്പർ ഹിറ്റുകൾ; മനസ്സിൽ കൊണ്ടു നടന്നത് ബിഗ് സ്‌ക്രീൻ മോഹം; ഹൃദയാഘാതം കൊണ്ടു പോകുന്നത് ടിവി പ്രേക്ഷകരുടെ പ്രിയങ്കരനെ; സംവിധായകൻ ആദിത്യൻ മരണം ഞെട്ടലാകുമ്പോൾ
തിരുവനന്തപുരം: പ്രശസ്ത ടെലിവിഷൻ സീരിയൽ സംവിധായകൻ ആദിത്യൻ(47) അന്തരിച്ചു. ഹൃദയാഘാതത്തെ തുടർന്ന് പുലർച്ചെ തിരുവനന്തപുരത്തായിരുന്നു അന്ത്യം. കൊല്ലം അഞ്ചൽ സ്വദേശിയാണ് ആദിത്യൻ. ഹൃദയാഘാതത്തെ തുടർന്ന് ആശുപത്രിയിലേക്ക് കൊണ്ടു പോകുന്നതിനിടെയായിരുന്നു മരണം.
സാന്ത്വനം, വാനമ്പാടി, ആകാശദൂത് അടക്കമുള്ള ഹിറ്റ് സീരിയലുകളുടെ സംവിധായകനാണ്. കൊല്ലം അഞ്ചൽ സ്വദേശിയായ ആദിത്യൻ ഏറെകാലമായി തിരുവനന്തപുരത്താണ് താമസം. പോസ്റ്റ്‌മോർട്ടത്തിന് ശേഷം മൃതദേഹം ഭാരത് ഭവനിൽ പൊതുദർശനത്തിന് വെക്കും. ഏഷ്യാനെറ്റിൽ സംപ്രേഷണം ചെയ്തുവരുന്ന സാന്ത്വനമാണ് അവസാനത്തെ പരമ്പര. പാണ്ഡ്യൻ സ്റ്റോർസിന്റെ റീമേക്കാണ് സാന്ത്വനം.
വർഷങ്ങളായി സീരിയൽ സംവിധാന രംഗത്തിൽ ആദിത്യന്റെ സജീവ പ്രവർത്തനങ്ങളുടെ ഫലമായി ഹിറ്റ് സീരിയലുകളാണ് മലയാളികൾക്കായി അദ്ദേഹം സമ്മാനിച്ചത്. സാന്ത്വനം, വാനമ്പാടി, ആകാശദൂത് തുടങ്ങിയ ഒട്ടനവധി സീരിയലുകൾ അദ്ദേഹത്തിന്റെ സംവിധാനത്തിൽ കുംടുംബപ്രേക്ഷകർ ഇരുകൈയും നീട്ടി സ്വീകരച്ചു. സിനിമകൾ സംവിധാനം ചെയ്യുന്നതിന്റെ ഒരുക്കങ്ങളിലേക്കും അദ്ദേഹം കടന്നിരുന്നു. അതിനിടെയാണ് അകാലത്തിലെ വിയോഗം. ഏറെക്കാലമായി തിരുവനന്തപുരത്ത് പേയാട് ആയിരുന്നു താമസം. പ്രേക്ഷകരുടെ പൾസ് നന്നായി അറിയാവുന്ന സംവിധായകനായിരുന്നു ആദിത്യൻ.
ആദിത്യന്റെ വിയോഗം അറിഞ്ഞ് വാചാലരായി താരങ്ങളും എത്താറുണ്ട്. ഒരു കുടുംബം പോലെ തന്നെയാണ് അദ്ദേഹത്തിന്റെ ലൊക്കേഷൻ എന്ന് താരങ്ങൾ പറഞ്ഞിരുന്നു. സാന്ത്വനം ഇത്രയധികം ഹിറ്റാവുമെന്ന് താനൊരിക്കലും പ്രതീക്ഷിച്ചിരുന്നില്ലെന്ന് അദ്ദേഹം പറഞ്ഞിരുന്നു. പതിവിൽ നിന്നും വ്യത്യസ്തമായ തരത്തിലുള്ള മേക്കിംഗും പ്രമേയവുമാണ് സാന്ത്വനത്തിന്റേത്.
പ്രണാമം ചേട്ടാ, എന്ത് പറയണം എന്നറിയില്ല ജീവിതത്തിൽ കൂടെ ചേർത്ത്‌നിർത്തി വളർത്തിയ ഓരോരുത്തരായി കണ്ണ് മുന്നിൽ നിന്നും പൊടുന്നനെ മാഞ്ഞുപോകുന്നത് വിശ്വസിക്കാൻ പറ്റുന്നില്ല എന്താ ചേട്ടാ നിങ്ങളെ കുറിച്ച് പറയേണ്ടത് അറിയില്ല അത്രമാത്രം എന്റെ അഭിനയജീവിതത്തിൽ ഗുരുനാഥനായും ജീവിതത്തിൽ ഒരു സഹോദരനെ പോലെയും സ്വാധീനിച്ച അങ്ങേക്ക് എങ്ങനെ ആദരാഞ്ജലികൾ അർപ്പിക്കണം എന്നറിയില്ല. ചേട്ടന്റെ കുടുംബത്തിന് എല്ലാം അതിജീവിക്കാൻ കരുത്തു നൽകട്ടെ ഈശ്വരൻ എന്നായിരുന്നു ഉമ നായർ കുറിച്ചത്.
എന്റെ ആത്മമിത്രവും ഏഷ്യനെറ്റ് 'സാന്ത്വനം' സീരിയലിന്റെ സംവിധായകനുമായ ആദിത്യൻ ഇന്ന് പുലർച്ചെ ഹൃദയാഘാതം മൂലം ഈ ലോകത്തോട് വിടവാങ്ങി. എന്ത് കാര്യവും എന്നോട് പറയാറുള്ള പ്രിയ ആദിത്യാ ഒരു യാത്രാമൊഴി പോലും തരാതെ ഞങ്ങളേ വിട്ടു പോയല്ലോ. എന്റെ വിഷമങ്ങൾ ഞാനിനി ആരോട് പറയും പ്രിയ മിത്രമേ. അതുകൊണ്ട് തന്നെ പ്രണാമവും ആദരാഞ്ജലിയും ഞാൻ മനപ്പൂർവ്വം അർപ്പിക്കുന്നില്ല. കാരണം നിങ്ങളിപ്പോഴും എന്റെ ഉള്ളിൽ ജീവനോടെ ചൈതന്യത്തോടെ തന്നെ ഉണ്ടെന്ന് ഞാൻ വെറുതെയെങ്കിലും വിശ്വസിച്ചോട്ടേ. എന്തൊരു ലോകം ദൈവമേ ഇതെന്നായിരുന്നു മനോജ് കുറിച്ചത്.
ആദരാഞ്ജലികൾ പ്രിയ സുഹൃത്തേ. ഏഷ്യാനെറ്റിൽ സംപ്രേഷണം ചെയ്തു വരുന്ന സാന്ത്വനം സീരിയലിന്റെ സംവിധായകൻ ആദിത്യൻ വിടവാങ്ങി. ജീവിതത്തിന്റെ പാതിയിൽ എല്ലാം അവസാനിപ്പിച്ച് ധൃതിയിൽ പോയതെന്തിനാണ് സുഹൃത്തെ, വിട എന്നായിരുന്നു ആൽബി ഫ്രാൻസിസ് കുറിച്ചത്.
