സംഗീതജ്ഞയും കലാഗവേഷകയുമായ ലീല ഓചേരി അന്തരിച്ചു; കർണാടകസംഗീതത്തിന് പുറമേ ഹിന്ദുസ്ഥാനിയിലും സോപാന സംഗീതത്തിലും നാടൻ പാട്ടുകളിലും നൃത്തത്തിലും അഗാധ പാണ്ഡിത്യം; രാജ്യം പത്മശ്രീ നൽകി ആദരിച്ച പ്രതിഭ
തിരുവനന്തപുരം: പ്രശസ്ത സംഗീതജ്ഞയും കലാ ഗവേഷകയുമായ ലീല ഓംചേരി അന്തരിച്ചു. 94 വയസായിരുന്നു. രാജ്യം കണ്ട മികച്ച സംഗീതജ്ഞയും ഡൽഹി സർവകലാശാലയിലെ മുൻ അദ്ധ്യാപികയുമായിരുന്നു. 2009ൽ രാജ്യം പത്മശ്രീ നൽകി ആദരിച്ചിട്ടുണ്ട്. നാടകാചാര്യൻ ഓംചേരി എൻ എൻ പിള്ളയാണ് ഭർത്താവ്.
കേരള സംഗീതനാടക അക്കാഡമിയുടെ ഫെലോഷിപ്പ് (1990), യുജിസി നാഷണൽ അസോസിയേറ്റ് അവാർഡ് എന്നിവ നേടിയിട്ടുണ്ട്. കന്യാകുമാരി ജില്ലയിലെ തിരുവട്ടാറിൽ കമുകറ പരമേശ്വര കുറുപ്പിന്റെയും ലക്ഷ്മിക്കുട്ടിയുടെയും മകളായി 1929 മെയ്‌ 31നാണ് ജനനം. പ്രശസ്ത ഗായകൻ പരേതനായ കമുകറ പുരുഷോത്തമന്റെ മൂത്ത സഹോദരിയാണ് കർണാടസംഗീതത്തിന് പുറമേ ഹിന്ദുസ്ഥാനി, സോപാന സംഗീതം, നാടൻ പാട്ടുകൾ, നൃത്തം എന്നിവയിൽ അഗാധ പാണ്ഡിത്യമുണ്ടായിരുന്നു. കർണാടകസംഗീതത്തിലും ഹിന്ദുസ്ഥാനി സംഗീതത്തിലും ബിരുദവും ഡൽഹി സർവ്വകലാശാലയിൽ നിന്ന് എംഎ, പിഎച്ച്ഡിയും നേടി. ഡൽഹി സർവ്വകലാശാലയിൽ അദ്ധ്യാപികയായിരുന്നു.
കേരളത്തിലെ ലാസ്യരചനകൾ (ഡോ. ദീപ്തി ഓംചേരി ഭല്ലയോടൊപ്പം രചിച്ചത്), ദ ഇമ്മോർട്ടൽസ് ഓഫ് ഇന്ത്യൻ മ്യൂസിക് (ഡോ. ദീപ്തി ഓംചേരി ഭല്ലയോടൊപ്പം രചിച്ചത്), ഗ്ലീനിങ്സ് ഓഫ് ഇന്ത്യൻ മ്യൂസിക് ആൻഡ് ആർട്ട് സ്റ്റഡീസ് ഇൻ ഇന്ത്യൻ മ്യൂസിക് ആൻഡ് അലൈഡ് ആർട്ട്സ് (അഞ്ച് ഭാഗം) എന്നിവയാണ് പ്രധാന കൃതികൾ. കേരള സംഗീത നാടക അക്കാദമി ഫെലോഷിപ്പും (1990) ലഭിച്ചിട്ടുണ്ട്.
