പാലക്കാട്: ചെർപ്പുളശ്ശേരി നെല്ലായ മോളൂരിലുണ്ടായ ബൈക്ക് അപകടത്തിൽ നവവരൻ മരിച്ചു. കരുമാനാം കുറുശ്ശി പുത്തൻ വീട്ടിൽ ജിബിൻ (28) ആണ് ആകസ്മികമായി മരിച്ചത്. ജിബിന്റെ ഒപ്പമുണ്ടായിരുന്ന ഭാര്യ ശ്രീഷ്മയെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു. ഈ മാസം 18 നായിരുന്നു ഇരുവരുടെയും വിവാഹം.

തൃശൂർ കേച്ചേരിയിലുള്ള ശ്രീഷ്മയുടെ വീട്ടിൽനിന്നും തിരികെ ബൈക്കിൽ കരുമാനാം കുറുശ്ശിയിലുള്ള ജിബിന്റെ വീട്ടിലേക്ക് വരുമ്പോഴാണ് അപകടം. മോളൂർ തവളപ്പടിയിലെ ഇറക്കത്തിൽ വച്ച് ബൈക്ക് നിയന്ത്രണം വിട്ട് സമീപത്തെ വീടിന്റെ മതിലിൽ ഇടിക്കുകയായിരുന്നു.

ഇരുവരും ഹെൽമറ്റ് ധരിച്ചിരുന്നെങ്കിലും ഗുരുതരമായി പരുക്കേറ്റു. മോളൂർ തവളപ്പടിയിൽ തിങ്കളാഴ്ച ഉച്ചയ്ക്ക് 12 മണിയോടെയാണ് അപകടം.
രണ്ടുപേരെയും നാട്ടുകാർ ഉടൻ തന്നെ വാണിയംകുളത്തെ സ്വകാര്യ ആശുപത്രിയിൽ എത്തിച്ചെങ്കിലും ജിബിനെ രക്ഷിക്കാനായില്ല.