അടിയന്തരാവസ്ഥക്കാലത്ത് കേരളത്തിൽ ആർ എസ് എസിനെ നയിച്ച പ്രധാനി; സ്വയം സേവകനായി തുടങ്ങി ദേശീയ നേതൃത്വത്തിൽ എത്തിയ നേതാവ്; എഴുത്തുകാരനും പ്രഭാഷകനും; മുതിർന്ന ആർഎസ്എസ് നേതാവ് ആർ ഹരി അന്തരിച്ചു

കൊച്ചി: മുതിർന്ന ആർഎസ്എസ് നേതാവ് ആർ ഹരി അന്തരിച്ചു. 93 വയസ്സായിരുന്നു. വാർദ്ധക്യ സഹജമായ അസുഖത്തെ തുടർന്ന് എറണാകുളത്തെ ആശുപത്രിയിൽ ചികിൽസയിലായിരുന്നു. ആർ എസ് എസിന്റെ മുതിർന്ന പ്രചാരകനും എഴുത്തുകാരനും ആയ ആർ ഹരി പരിവാറുകാരുടെ ബൗദ്ധിക മുഖങ്ങളിൽ പ്രധാനിയായിരുന്നു. ബഹുഭാഷാ പണ്ഡിതനുമായിരുന്നു. കേരളത്തിൽ നിന്നും ആർ എസ് എസിന്റെ ദേശീയ നേതൃത്വത്തിലെത്തിയ വ്യക്തിയാണ് ആർ ഹരി.

എറണാകുളം ജില്ലയിലാണ് ജനനം. അച്ഛൻ രംഗ ഷേണോയ് അമ്മ പത്മാവതി. പഠനം എറണാകുളം സെന്റ് ആൽബർട്ട്‌സ് ഹൈസ്‌കൂളിലും ,മഹാരാജാസ് കോളേജിലും .ബാലസ്വയംസേവകനായി രാഷ്ട്രിയ സ്വയം സേവക സംഘത്തിൽ ചേർന്നു. ഭാസ്‌ക്കർ റാവുജിയുമായി അടുത്ത ബന്ധം പുലർത്തി. ഇതാണ് പരിവാർ ജീവിതത്തിൽ നിർണ്ണായകമായത്.

1948ൽ മഹാത്മാ ഗാന്ധിയുടെ വധത്തെ തുടർന്നു സംഘ നിരോധനം ഉണ്ടായപ്പോൾ സംഘത്തിന്റെ അഖിലഭാരതീയ സത്യാഗ്രഹത്തിൽ പങ്കെടുത്തു ജയിൽ വാസം അനുഷ്ട്ടിച്ചതിനാൽ ഒരു വർഷത്തെ കോളേജ് വിദ്യാഭ്യാസം മുടങ്ങി. പിന്നീട് ഡിഗ്രി പാസ്സായി. 1951ൽ സംഘപ്രചാരകായി, ആദ്യം വടക്കൻ പറവൂരിൽ. പിന്നീട്, തൃശൂർ ജില്ല, പാലക്കാട് ജില്ല, തിരുവനന്തപുരം വിഭാഗ് പ്രചാരക്, എറണാകുളം വിഭാഗ് പ്രചാരക്, കോഴിക്കോട് വിഭാഗ് പ്രചാരക് എന്നിങ്ങിനെ പ്രവർത്തിച്ചു.

1980ൽ സഹപ്രാന്ത് പ്രചാരകനായി. 1983ൽ അദ്ദേഹം കേരള പ്രാന്ത് പ്രചാരകും,1989 ൽ അഖില ഭാരതീയ സഹ-ബൗധിക് പ്രമുഖായി.ഒരു വർഷം കഴിഞ്ഞപ്പോൾ അഖില ഭാരതീയ ബൗധിക് പ്രമുഖുമായി. അടിയന്തരാവസ്ഥക്കാലത്ത് കേരളത്തിൽ ആർ എസ് എസിന്റെ നെടുംതൂണായ നേതാവായിരുന്നു ഹരി. അടിയന്തരാവസ്ഥ കാലത്ത് പത്രവും ഇറക്കി. കേരളത്തിൽ കുരുക്ഷേത്രം എന്ന പേരിലായിരുന്നു ആ പത്രം. അതിന്റെ ചുമതല ആർ ഹരിക്കും എം.എ കൃഷ്ണനുനുമായിരുന്നു.

അടിയന്തരാവസ്ഥക്കു ശേഷം കുരുക്ഷേത്ര എന്ന പേരിൽ സംഘത്തിന്റെ പ്രസിദ്ധീകരണ വിഭാഗം തുടങ്ങിയത് ആർ ഹരി ആയിരുന്നു. നിരവധി ഭാഷകളിൽ നിരവധി പുസ്തകങ്ങൾ എഴുതിയിട്ടുണ്ട്.  1990 മുതൽ 2005 വരെയായിരുന്നു ബൗദ്ധിക് പ്രമുഖ് സ്ഥാനം വഹിച്ചത്. ആർഎസ്എസ് രീതിപ്രകാരം 75ാം വയസ്സിൽ എല്ലാ ഔദ്യോഗിക ചുമതകളിൽനിന്ന് ഒഴിഞ്ഞു.

2 വർഷംകൂടി ചില പ്രത്യേക ചുമതലകൾ തുടർന്നു. 2007 മുതൽ പ്രചാരക് മാത്രം. 2000ൽ ഉത്തരേന്ത്യയിലുണ്ടായ അപകടത്തിൽ ഗുരുതരമായി പരുക്കേറ്റ ആർ. ഹരിക്കു മലയാളമൊഴികെ മറ്റു ഭാഷകളെല്ലാം ഓർമയിൽനിന്ന് നഷ്ടപ്പെട്ടു. പിന്നീടു ചികിൽസയ്ക്കുശേഷമാണ് അവ തിരിച്ചുകിട്ടിയത്.

അതിനുശേഷം കനപ്പെട്ട ഗ്രന്ഥങ്ങൾ അദ്ദേഹം പ്രസിദ്ധീകരിക്കുകയും ചെയ്തു. മലയാളം, കൊങ്കണി, തമിഴ്, ഹിന്ദി, സംസ്‌കൃതം, ഇംഗ്ലിഷ്, മറാഠി, ഗുജറാത്തി, ബംഗാളി, അസമീസ് എന്നീ 10 ഭാഷകൾ അറിയാവുന്ന ഹരി വിവിധ ഭാഷകളിലായി അറുപതോളം പുസ്തകങ്ങൾ പ്രസിദ്ധീകരിച്ചിട്ടുണ്ട്. 'വ്യാസഭാരതത്തിലെ ദ്രൗപതി' എന്ന പുസ്തകം ആർ.ഹരിയുടേതാണ്.

ഭാരതത്തിലെ എല്ലാ സംഘ മണ്ഡലങ്ങളിലും വ്യക്തി ബന്ധങ്ങൾ.പ്രവർത്തനത്തിന്റെ ഭാഗമായി നിരവധി വിദേശ രാഷ്ട്രങ്ങൾ സന്ദർശിച്ചിട്ടുണ്ട്

കൃതികൾ

വിചാര സരണി
സംഘകാര്യപദ്ധതിയുടെ വികാസം
ഡോക്ടർ ഹെഡ്ഗേവാർ സംഭവങ്ങളിലൂടെ
സംഘശിൽപ്പിയുടെ കരവിരുത്
അപ്ന കേരൾ
മാം കെ ചരണോം പർ
വാല്മീകി രാമായൺ ഒരു പഠനം (മലയാളത്തിൽ നിന്ന് ഹിന്ദിയിലേക്ക് തർജമ ചെയ്യപ്പെട്ടിട്ടുണ്ട്)
വന്ദേ മാതരത്തിന്റെ കഥ
വിഷ്ണു സഹസ്രനാമം (വ്യാഖ്യാനം)
ശ്രീ നൃസിംഹസ്തുതി
ഭഗവത് ഗീത നിഘണ്ടു
ശ്രീ ഗുരുജി സാഹിത്യ സർവ്വസ്വം (മുഖ്യ സംയോജകൻ) (12 വാല്യം മിക്കവാറും എല്ലാ ഭരതീയ ഭാഷകളിലും)
വോൾവയിൽ നിന്ന് ഗംഗയിലേക്ക്
അന്നത്തെ ഭാരതവും ഇന്നത്തെ ഇന്ത്യയും (തർജമ)
രാമായണത്ത്തിലെ സുഭാഷിതങ്ങൾ
ഗുരുജി ഗോൾവൾക്കർ (ജീവചരിത്രം)
കേശവസംഘ നിർമ്മാത (തർജമ)
ഒളിവിലെ തെളിനാളങ്ങൾ
രാഷ്ട്രചിന്തനം വേദങ്ങളിൽ (ശ്രീപദ് സാത് വേൽ ക്കരുടെ ഹിന്ദി പുസ്തകത്തിന്റെ തർജമ)
ഇനി ഞാൻ ഉണരട്ടെ
രാഷ്ട്രവും സംസ്‌ക്കാരവും
അമ്മയുടെ കാൽക്കൽ
മരണത്തെ വെല്ലുവിളിച്ചവർ
സ്മരണാന്ജലി