ബോളിവുഡ് നടൻ സമീർ ഖാഖർ അന്തരിച്ചു; അന്ത്യം ശ്വസനസംബന്ധമായ അസുഖത്തെത്തുടർന്ന് മുംബൈയിൽ; ശ്രദ്ധേയനായത് ടെലിവിഷൻ ഷോകളിലൂടെ

മുംബൈ. നടൻ സമീർ ഖാഖർ അന്തരിച്ചു. 71 വയസായിരുന്നു. ശ്വാസകോശ സംബന്ധമായ രോഗത്തെ തുടർന്ന് മുംബൈയിലെ സ്വകാര്യ ആശുപത്രിയിൽ ചികിത്സയിലിരിക്കെയായിരുന്നു അന്ത്യം.എൺപതുകളിലെ ടെലിവിഷൻ പരമ്പരകളായ നൂക്കഡ്, സർക്കസ് എന്നിവയിലൂടെ പ്രശസ്തനായ അദ്ദേഹം നിരവധി ബോളിവുഡ് ചിത്രങ്ങളിലും അഭിനയിച്ചിട്ടുണ്ട്.

സഹോദരൻ ഗണേശ് ഖാഖറാണ് സമീറിന്റെ മരണം സ്ഥിരീകരിച്ചത്. ആന്തരാവയവങ്ങൾ തകരാറിലായതാണ് മരണകാരണമെന്ന് റിപ്പോർട്ടുകൾ സൂചിപ്പിക്കുന്നു.ശ്വസനസംബന്ധമായ പ്രശ്നങ്ങളും നടനുണ്ടായിരുന്നുവെന്ന് സഹോദരൻ ഗണേശ് അറിയിച്ചു. ഉറങ്ങാൻ കിടന്ന സമീർ ബോധരഹിതനായെന്നും പെട്ടെന്ന് ആശുപത്രിയിൽ എത്തിച്ചുവെന്നും ഗണേശ് വ്യക്തമാക്കി.

മൂത്രാശയസംബന്ധമായ പ്രശ്നങ്ങളും നടനെ അലട്ടിയിരുന്നു.വെന്റിലേറ്ററിലായിരിക്കെ പുലർച്ചെ 4.30 യോടെ മരണം സംഭവിക്കുകയായിരുന്നുവെന്ന് ഗണേശ് കൂട്ടിച്ചേർത്തു.സമിറിന്റെ പരീന്ദ, ജയ് ഹോ, ഹസീ തോ ഫസീ, സീരിയസ് മെൻ എന്നീ ചിത്രങ്ങളിലെ വേഷവും സൺഫ്ലവർ എന്ന വെബ് സീരിസിലെ വേഷവും ശ്രദ്ധിക്കപ്പെട്ടിരുന്നു. നടന്റെ മരണത്തിൽ അനുശോചനമറിയിച്ചുകൊണ്ട് നിരവധി താരങ്ങളും ആരാധകരും എത്തുകയാണ്.