ഡോ. വി.പി. ഉണ്ണിക്കൃഷ്ണൻ ബ്രിസ്‌ബേനിൽ അന്തരിച്ചു; വിട പറഞ്ഞത് ഓർഡർ ഓഫ് ഓസ്ട്രേലിയ അവാർഡ് നേടിയ വ്യക്തിത്വം; സംസ്‌ക്കാരം പിന്നീട് തിരുവനന്തപുരത്ത്
ബ്രിസ്ബൻ : ഓസ്ട്രേലിയൻ ഇന്ത്യൻ സമൂഹത്തിൽ സജീവ സാന്നിധ്യമായിരുന്ന ഡോ.വി.പി. ഉണ്ണിക്കൃഷ്ണൻ (66)അന്തരിച്ചു. ഉന്നത സിവിലിയൻ ബഹുമതി ആയ ഓർഡർ ഓഫ് ഓസ്ട്രേലിയ അവാർഡ് നൽകി ഓസ്ടേലിയൻ ഗവൺമെന്റ് ആദരിച്ചിട്ടുള്ള ഉണ്ണികൃഷ്ണന്റെ വിയോഗം ക്യുൻസ് ലാൻഡ് മലയാളി സമൂഹത്തെ ഒന്നടങ്കം ദുഃഖത്തിലാഴ്‌ത്തി.
ക്യുൻസ് ലാൻഡ് സ്റ്റേറ്റ് ട്രാൻസ്പോർട്ട് ആൻഡ് മെയിൻ റോഡ്സ് പ്രിൻസിപ്പൽ അഡൈ്വസർ ആയിരുന്ന ഉണ്ണിക്കൃഷ്ണൻ ഇന്ത്യൻ അസോസിയേഷൻ (FICQ) സെക്രട്ടറി. ക്യുൻസ് ലാൻഡ് മലയാളി അസോസിയേഷൻ പ്രസിഡന്റ് തുടങ്ങിയ നിലകളിൽ ദീർഘകാലം പ്രവർത്തിച്ചിരുന്നു. ജ്വാല, OHM തുടങ്ങി ഒട്ടനവധി കലാ സാംസ്‌കാരിക സംഘടനകളുടെയും സ്ഥാപകനാണ്.
കൊച്ചിൻ യൂണിവേഴ്‌സിറ്റിയിൽ നിന്നു റാങ്കോടെ ജിയോളജിയിൽ മാസ്റ്റേഴ്‌സും തുടർന്ന് ഡോക്ടറേറ്റും നേടിയ ഉണ്ണിക്കൃഷ്ണൻ ഇടുക്കിയിൽ ജില്ലാ ഹൈഡ്രോ ജിയോളജിസ്റ്റായാണ് സർവീസ് ആരംഭിക്കുന്നത്. മികച്ച സേവനത്തിനുള്ള കേരള സർക്കാരിന്റെ അവാർഡുകൾ നിരവധി വട്ടം നേടിയിരുന്നു . സിഡ്നി UNSW യൂണിവേഴ്‌സിറ്റിയിൽ സ്‌കോളർഷിപ്പോടെ ഗവേഷണം പൂർത്തിയാക്കിയതോടെയാണ് ഓസ്ട്രേലിയയിൽ ഉന്നത ഉദ്യോഗം ലഭിക്കുന്നതും ഇവിടേക്ക് കുടിയേറുന്നതും.
സിഡ്നി ഒളിമ്പിക്സ് ഒട്ടേറെ പത്രങ്ങൾക്കുവേണ്ടി ഇദ്ദേഹം റിപ്പോർട്ട് ചെയ്തു.ലോർഡ്‌സ് മേയറുടെ അവാർഡും ഡിപ്പാർട്ട്‌മെന്റിലെ ഒട്ടേറെ അവാർഡുകളും നേടിയ ഉണ്ണിക്കൃഷ്ണൻ ആദ്യ കാലങ്ങളിൽ കുടിയേറ്റകാലത്തു കഷ്ടപ്പെടുന്നവരുടെ ഏറ്റവും വലിയ സഹായ ഹസ്തമായിരുന്നു എന്ന് സാക്ഷ്യപ്പെടുത്തുന്ന നൂറുകണക്കിന് മലയാളികളുണ്ട്.തിരുവനന്തപുരം പള്ളിച്ചൽ കൊട്ടറ പരേതരായ വേലായുധൻ - പത്മാവതി അമ്മ ദമ്പതികളുടെ മകനാണ്.
ഭാര്യ സബിത കോഴഞ്ചേരി പുല്ലാട്, താഴത്തേടത്തു കുടുംബാംഗമാണ് . മക്കൾ : ഗാർഗി ആദർശ് (ജനറൽ മാനേജർ, പ്രോട്രേഡ് യുണൈറ്റഡ് - ബ്രിസ്ബൻ) , സിദ്ധാർത്ഥ് സറ്റോം വാട്ടർ എൻജിനിയർ , EGIS ബ്രിസ്ബൻ.മരുമകൻ : ആദർശ് മേനോൻ (സീനിയർ എൻജിനിയർ, ടീം വർക്‌സ് - ബ്രിസ്ബൻ).മൃതദേഹം റോയൽ ബ്രിസ്ബൻ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംസ്‌കാരം തിരുവനന്തപുരത്ത് പിന്നീട് .
