മുംബൈ: നടിയും മോഡലുമായ പൂനം പാണ്ഡേ (32) അന്തരിച്ചു. സെർവിക്കൽ കാൻസറിനെ തുടർന്നായിരുന്നു അന്ത്യമെന്ന് പൂനത്തിന്റെ ഔദ്യോഗിക അക്കൗണ്ടിൽ പോസ്റ്റ് ചെയ്ത ഇൻസ്റ്റഗ്രാം പോസ്റ്റിൽ കുറിച്ചു. ഉത്തർപ്രദേശിലെ വസതിയിലായിരുന്നു അന്ത്യമെന്ന് ദേശീയ മാധ്യമങ്ങൾ റിപ്പോർട്ട് ചെയ്തു. പൂനത്തിന്റെ ഇസ്റ്റാംഗ്രാം പോസ്റ്റ് അധികരിച്ചാണ് ദേശീയ മാധ്യമങ്ങളും മരണ വാർത്ത റിപ്പോർട്ടു ചെയ്യുന്നത്.

സെർവിക്കൽ ക്യാൻസർ ബാധയായിരുന്ന നടി ഇന്ന് രാവിലെ മരണപ്പെട്ടുവെന്നാണ് ഇൻസ്റ്റഗ്രാമിലെ കുറിപ്പിൽ വ്യക്തമാക്കുന്നത്. 'ഈ പ്രഭാതം ഞങ്ങളെ സംബന്ധിച്ച് വളരെ അധികം ബുദ്ധിമുട്ടേറിയതാണ്. പ്രിയപ്പെട്ട പൂനത്തെ സെർവിക്കൽ ക്യാൻസർ ബാധിച്ച് ഞങ്ങൾക്ക് നഷ്ടപ്പെട്ടുവെന്ന് നിങ്ങളെ അറിയിക്കുന്നതിൽ അഗാധമായ സങ്കടമുണ്ട്. ബന്ധപ്പെടുന്ന ഓരോ വ്യക്തിയും ശുദ്ധമായ സ്‌നേഹത്തോടും ദയയോടും കൂടിയായിരുന്നു അവളോട് പെരുമാറിയിരുന്നത്. ഇത് വേദനയുടെ ടൈം ആണ്, അവളെ ഓർക്കുന്ന ഈ സമയത്ത് സ്വകാര്യത മാനിക്കണം എന്ന് അഭ്യർത്ഥിക്കുന്നു.' എന്നാണ് ഇൻസ്റ്റഗ്രാമിലെ കുറിപ്പ്.

ഇൻസ്റ്റാഗ്രാം പോസ്റ്റ് പുറത്ത് വന്നതിന് പിന്നാലെ ഞെട്ടൽ രേഖപ്പെടുത്തിക്കൊണ്ട് നിരവധി പേരാണ് രംഗത്ത് വന്നത്. നിരവധി ആരാധകർ വാർത്ത വിശ്വസിക്കാൻ ഇപ്പോഴും തയ്യാറായിട്ടില്ല. 'ശരിക്കും അവളെ നമുക്ക് നഷ്ടപ്പെട്ടോ? ഇത് ഒരു ഫേക്ക് ന്യൂസ് അല്ലാലോ' എന്നാണ് ഒരാൾ ചോദിക്കുന്നത്. 'ഇത് ചില മാർക്കറ്റിങ് ഗിമ്മിക്ക് അല്ലേ, അങ്ങനെയെങ്കിൽ ഇത് തീർത്തും തെറ്റായ സമീപനമാണ്. പക്ഷേ ഇത് ശരിയാണെങ്കിൽ, താരത്തിന് ആദരാഞ്ജലികൾ' എന്നാണ് മറ്റൊരാൾ കുറിക്കുന്നത്.

പൂനം പാണ്ഡെയുടെ ഇൻസ്റ്റഗ്രാം അക്കൗണ്ട് ഹാക്ക് ചെയ്യപ്പെട്ടുവെന്ന പ്രചരണവുമുണ്ട്. 2013ൽ നഷ എന്ന ചിത്രത്തിലൂടെ ബോളിവുഡിൽ അരങ്ങേറ്റം കുറിച്ച താരമാണ് പൂനം പാണ്ഡെ. ഹിന്ദിക്ക് പുറമെ കന്നഡ, തെലുങ്ക് ചിത്രങ്ങളിലും താരം അഭിനയിച്ചിട്ടുണ്ട്. മോഡലിങ് രംഗത്ത് സജീവമായ താരം പലപ്പോഴും വിവാദങ്ങളിലും അകപ്പെട്ടിട്ടുണ്ട്.

2011-ലെ ക്രിക്കറ്റ് ലോകകപ്പ് ഇന്ത്യൻ ടീം സ്വന്തമാക്കുകയാണെങ്കിൽ നഗ്‌നയായി ആളുകൾക്ക് മുമ്പിൽ എത്തുമെന്ന് പ്രഖ്യാപിച്ചതോടെയാണ് താരം കൂടുതൽ ശ്രദ്ധേയയാകുന്നത്. ആ വർഷം ഇന്ത്യ ലോകകപ്പ് നേടിയെങ്കിലും പൊതുജനങ്ങളിൽ നിന്നും ബി സി സി ഐ യിൽ നിന്നുമുണ്ടായ എതിർപ്പിനെത്തുടർന്ന് പൂനം പാണ്ഡെയ്ക്കു വാക്കുപാലിക്കാൻ കഴിഞ്ഞില്ല. അതേസമയം, 2012-ലെ ഐ പി എൽ 5-ആം പതിപ്പിൽ കൊൽക്കത്ത നൈറ്റ് റൈഡേഴ്‌സ് വിജയികളായപ്പോൾ പൂനം പാണ്ഡെ തന്റെ നഗ്‌നചിത്രങ്ങൾ പോസ്റ്റുചെയ്തിരുന്നു

ഉത്തർപ്രദേശിലെ കാൺപൂരിലാണ് പൂനം ജനിച്ചത്. മോഡലിങ്ങിലൂടെയാണ് സിനിമയിലെത്തിയത്. 2010ൽ നടന്ന ഗ്ലാഡ്രാഗ്സ് മാൻഹണ്ട് ആൻഡ് മെഗാമോഡൽ മത്സരത്തിലെ ആദ്യ ഒൻപതു സ്ഥാനങ്ങളിലൊന്നിൽ ഇടംനേടിയതോടെ ഫാഷൻ മാസികയുടെ മുഖചിത്രമായി. 2013 ൽ പുറത്തിറങ്ങിയ നഷ എന്ന ഹിന്ദി ചിത്രത്തിലൂടെയായിരുന്നു അരങ്ങേറ്റം. ലൗ ഈസ് പോയിസൺ, അദാലത്ത്, മാലിനി ആൻഡ് കോ, ആ ഗയാ ഹീറോ, ദ ജേണി ഓഫ് കർമ തുടങ്ങി കന്നട, ഹിന്ദി, തെലുഗ് ഭാഷകളിലായി പത്തോളം സിനിമകളിൽ അഭിനയിച്ചിട്ടുണ്ട്.