ഗ്ലാസ് ഡോർ ഉണ്ടെന്ന് മനസിലാകാതെ കടയിലേക്ക് കുതിച്ചു; ഡോറിൽ തലയിടിച്ച് തെറിച്ചുമലർന്നു വീണു;തൃശ്ശൂരിൽ നേവി റിട്ട. ഉദ്യോഗസ്ഥന് ദാരുണാന്ത്യം; മരണകാരണം തലയ്ക്ക് പിന്നിലേറ്റ ആഴത്തിലുള്ള മുറിവ്; അപകടത്തിന്റെ സിസിടിവി ദൃശ്യങ്ങൾ പുറത്ത്

തൃശൂർ: ഗ്ലാസ് ഡോറിൽ തലയിടിച്ച് വീണ് വയോധികന് ദാരുണാന്ത്യം.നാവികസേനയിലെ റിട്ട. ഉദ്യോഗസ്ഥനും പ്രവാസി മലയാളിയുമായ മണത്തല സ്വദേശിയായ ഉസ്മാൻ ഹാജിയാണ് മരണപ്പെട്ടത്.84 വയസ്സായിരുന്നു.ചാവക്കാട് മണത്തലയിലാണ് അപകടം.

സംഭവം ഇങ്ങനെ..ചാവക്കാട് മണത്തലയിൽ ഡ്രൈ ഫ്രൂട്ട്‌സ് കടയിൽ സാധനങ്ങൾ വാങ്ങാൻ എത്തിയതായിരുന്നു ഉസ്മാൻ ഹാജി.സാധനങ്ങൾ വാങ്ങാനുള്ള തിടുക്കത്തിൽ ഗ്ലാസ് ഡോർ ആണെന്ന് അറിയാതെ വേഗത്തിൽ കടയിലേക്കു കയറി. ഉടനെ ഡോറിൽ തലയിടിച്ച് തെറിച്ച് മലർന്നടിച്ചു വീഴുകയായിരുന്നു.

ഉടനെ, ചാവക്കാട്ടെ ആശുപത്രിയിൽ എത്തിച്ചെങ്കിലും അബോധാവസ്ഥയിലായിരുന്നു. വിദഗ്ധ ചികിത്സയ്ക്കായി തൃശൂരിലെ ആശുപത്രിയിലേക്കു മാറ്റിയെങ്കിലും രക്ഷിക്കാനായില്ല. തലയുടെ പുറകിൽ ആഴത്തിൽ മുറിവേറ്റതാണ് മരണകാരണം. ഗ്ലാസ് ഡോർ ആണെന്ന് തിരിച്ചറിയാൻ കഴിയാതെ വേഗത്തിൽ അകത്തേക്കു കടന്നതായിരുന്നു ദാരുണമായ അപകടത്തിനു കാരണം.

ഗ്‌ളാസ് ഡോറുകൾ ഉണ്ടെന്ന് മുന്നറിയിപ്പ് നൽകുകയോ തിരിച്ചറിയാൻ ഡോറുകളിൽ സ്റ്റിക്കറുകൾ ഒട്ടിക്കാത്തതും ആണ് പലപ്പോഴും ഇത്തരം അപകടങ്ങൾക്ക് കാരണമാകുന്നത്. ഗ്‌ളാസ് ഡോർ തിരിച്ചറിയാൻ കഴിയാത്തത് നിരവധി അപകടങ്ങൾക്ക് ഇടയാക്കിയിട്ടുണ്ട്. മൂന്നുവർഷത്തിന് മുമ്പ് പെരുമ്പാവൂരിൽ ബാങ്കിന്റെ ചില്ലുവാതിലിൽ ഇടിച്ച് ചേരാനല്ലൂർ സ്വദേശി ബീന എന്ന നാൽപ്പത്തഞ്ചുകാരി മരിച്ചിരുന്നു.

പെരുമ്പാവൂർ എ എം റോഡിലെ ബാങ്ക് ഓഫ് ബറോഡ ശാഖയിലായിരുന്നു അപകടം .ഉച്ചയോടെ ബാങ്കിലെത്തിയ ബീന നടപടിക്രമങ്ങൾ പൂർത്തിയാക്കി പുറത്തേക്കിറങ്ങിയെങ്കിലും താക്കോൽ എടുക്കാൻ മറന്നിരുന്നു. തിരികെ കയറി താക്കോൽ എടുത്തശേഷം വേഗത്തിൽ പുറത്തേക്ക് കടക്കുന്നതിനിടെ ശക്തിയായി ചില്ലുവാതിലിൽ ഇടിച്ചു. വയറിൽ ഉൾപ്പെട ദേഹമാകെ ചില്ല് തുളച്ച് കയറുകയായിരുന്നു.