തനിക്ക് വധഭീഷണി എന്ന സ്വപ്നയുടെ മൊഴിയിൽ കഴമ്പില്ലെന്ന ഡിഐജിയുടെ റിപ്പോർട്ട്: അന്വേഷണ ഏജൻസികളുടെ ദൗത്യം സർക്കാരിനെ വെള്ളപൂശുക എന്ന് മുല്ലപ്പള്ളി
തിരുവനന്തപുരം: സിപിഎമ്മും സർക്കാരും പ്രതിസ്ഥാനത്ത് വരുന്ന കേസുകളിൽ അവരെ വെള്ളപൂശുന്ന റിപ്പോർട്ട് നൽകുന്ന ദൗത്യമാണ് ഇപ്പോൾ സംസ്ഥാന അന്വേഷണ ഏജൻസികൾ ചെയ്യുന്നതെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ. അതിന് ഒടുവിലത്തെ ഉദാഹരണമാണ് വധഭീഷണിയെന്ന സ്വപ്ന കോടതിയിൽ നൽകിയ മൊഴിയിൽ കഴമ്പില്ലെന്ന ജയിൽ ഡിഐജിയുടെ അന്വേഷണ റിപ്പോർട്ട്. സംസ്ഥാന അന്വേഷണ ഏജൻസികളെ ദുരുപയോഗം ചെയ്ത് അവയെ രാഷ്ട്രീയ ആവശ്യത്തിന് ഉപയോഗിക്കുകയാണ് മുഖ്യമന്ത്രി ചെയ്യുന്നതെന്നും മുല്ലപ്പള്ളി കുറ്റപ്പെടുത്തി.
ജീവൻ അപകടത്തിലാണെന്ന് സ്വപ്ന കോടതിയെ ബോധ്യപ്പെടുത്തിയതിനെ നിസ്സാരമായി കാണാൻ സാധിക്കില്ല. എന്നാൽ അതിനെയെല്ലാം തള്ളിക്കളയുന്ന റിപ്പോർട്ടാണ് ജയിൽ വകുപ്പിന്റേത്. നേരത്തെ സ്വപ്നയുടെ ശബ്ദസന്ദേശം പുറത്ത് വന്നപ്പോഴും സമാനമായ നിലപാടാണ് ജയിൽ വകുപ്പ് സ്വീകരിച്ചത്. എന്നാലതിൽ അന്വേഷണം നടത്തി പ്രതികളെ കണ്ടെത്തേണ്ട പൊലീസ് ആകട്ടെ ആ കേസ് അട്ടിമറിക്കുന്ന നിലപാടാണ് സ്വീകരിക്കുന്നത്.സാങ്കേതിക സഹായത്തോടെ പുറത്ത് വന്ന സ്വപ്നയുടെ ശബ്ദസന്ദേശത്തിന് പിന്നിൽ വൻ ഗൂഢാലോചന നടന്നിട്ടുണ്ട്.അതിന് പിന്നലെ ശക്തികളെ കണ്ടെത്തേണ്ടത് സ്വർണ്ണക്കടത്ത് കേസിന്റെ മുന്നോട്ടുള്ള അന്വേഷണത്തിന് നിർണ്ണായകമാണ്. ശബ്ദസന്ദേശം പുറത്തുവന്ന സംഭവത്തിലും വധഭീഷണിയുമായി ബന്ധപ്പെട്ട വിഷയത്തിലും ശരിയായ രീതിയിൽ അന്വേഷണം നടത്തിയാൽ കുടുങ്ങുന്നത് മുഖ്യമന്ത്രിയും സിപിഎം നേതാക്കളും ആയിരിക്കുമെന്നും മുല്ലപ്പള്ളി പറഞ്ഞു.
മുഖ്യമന്ത്രിയുടെയും സിപിഎമ്മിന്റെയും താൽപ്പര്യങ്ങൾക്ക് അനുസരിച്ച് മംഗളപത്രം രചിക്കുന്ന ഒരുകൂട്ടം ഉദ്യോഗസ്ഥരാണ് ഇത്തരം വിധ്വംസക പ്രവർത്തനങ്ങൾക്ക് കുടപിടിക്കുന്നത്.മാറിവരുന്ന ഭരണകൂടങ്ങൾക്ക് അനുസൃതമായി നിറം മാറാമെന്ന് ഉദ്യോഗസ്ഥർ കരുതരുത്.സത്യസന്ധവും നിർഭയവുമായി നിയമവാഴ്ച നടപ്പാക്കുകയും ജനങ്ങൾക്ക് നീതി ഉറപ്പാക്കുകയും ചെയ്യുകയാണ് സംസ്ഥാന അന്വേഷണ ഏജൻസികളുടെ ധർമ്മമെന്നും മുല്ലപ്പള്ളി ഓർമ്മിപ്പിച്ചു.
സ്വർണ്ണക്കടത്തുമായി ബന്ധപ്പെട്ട എല്ലാത്തരം അന്വേഷണങ്ങളിലും സംസ്ഥാന അന്വേഷണ ഏജൻസികൾ ഒളിച്ചുകളി നടത്തുകയാണ്.സ്വപ്ന വ്യാജസർട്ടിഫിക്കറ്റ് ഉപയോഗിച്ച് സർക്കാർ ജോലി നേടിയ സംഭവത്തിലും അന്വേഷണം എങ്ങും എത്തിയില്ല. സെക്രട്ടേറിയറ്റിലെ ഫയൽ കത്തിയ സംഭവത്തിലും അസ്വാഭാവികത ഇല്ലെന്ന കണ്ടുപിടിത്തമാണ് കേരള പൊലീസ് നടത്തിയത്. അതേസമയം ഷോർട്ട് സർക്യൂട്ടെന്ന പൊലീസിന്റെ വാദഗതികളെ അപ്പാടെ നിഷേധിക്കുന്ന റിപ്പോർട്ടാണ് ഫോറൻസിക് വകുപ്പ് കോടതിയിൽ സമർപ്പിച്ചത്. ഇത് സർക്കാരിന്റെയും പൊലീസിന്റെയും കള്ളക്കളി വെളിച്ചെത്തു കൊണ്ടുവന്ന സംഭവം കൂടിയാണ്.ലൈഫ് മിഷൻ കേസിലും വിജിലൻസ് അന്വേഷണം പ്രഖ്യാപിച്ച് പുകമുറ സൃഷ്ടിക്കാനാണ് ശ്രമം.സിബിഐ അന്വേഷണത്തിന് ഏത് വിധേനയും തടയിടുക എന്നതിന് അപ്പുറം ലൈഫുമായി ബന്ധപ്പെട്ട് ഇപ്പോൾ നടക്കുന്ന വിജിലൻസ് അന്വേഷണത്തിന് ഒരു പ്രസ്‌കതിയുമില്ലെന്നും മുല്ലപ്പള്ളി പറഞ്ഞു.
