കോതമംഗലത്ത് യുവാവിനെ കുത്തി കൊലപ്പെടുത്തിയ ആൾ പിടിയിൽ; കൊലപാതകത്തിന് പിന്നിൽ വ്യക്തിവൈരാഗ്യമെന്ന് സൂചന

കോതമംഗലം: യുവാവിനെ കുത്തികൊലപ്പെടുത്തിയ കേസിൽ പുതുപ്പാടി ചാലിയിൽ പുത്തൻപുരയിൽ ദിലീപ് (40) നെ കോതമംഗലം പൊലീസ് അറസ്റ്റ് ചെയ്തു. പ്രിൻസ് പി. ജോർജാണ് കൊല്ലപ്പെട്ടത്. കഴിഞ്ഞ ദിവസം രാത്രിയാണ് സംഭവം. സംഭവത്തിന് പിന്നിൽ വ്യക്തി വൈരാഗ്യമാണെന്നാണ് പ്രാഥമിക അന്വേഷണത്തിൽ നിന്നും ലഭിക്കുന്ന വിവരം.

രാത്രി വഴിയിൽ സംസാരിച്ചു നിൽക്കുകയായിരുന്ന പ്രിൻസുമായി അതുവഴി വന്ന ദിലീപ് വാക്കേറ്റത്തിലേർപ്പെടുകയും പ്രിൻസിനെ കുത്തി വീഴ്‌ത്തുകയുമായിരുന്നു. കുത്തേറ്റ് റോഡിൽ വീണ പ്രിൻസിനെ ദിലീപും , ദീലിപിന്റെ സഹോദരനും കൂടിയാണ് കോതമംഗലത്തുള്ള ആശുപത്രിയിൽ എത്തിച്ചത്. ഇവർ തമ്മിൽ ഇതിനു മുമ്പും വാക്കേറ്റമുണ്ടായിട്ടുണ്ട്.

ഇൻസ്‌പെക്ടർ ബി. അനിൽ, എസ്.എ മാരായ പി.ഡി. അനൂപ് മോൻ ,ഷാജു കുര്യാക്കോസ്, എഎസ്ഐ മാരായ രഘുനാഥ്, സാബു തുടങ്ങിയവരാണ് അന്വേഷണ സംഘത്തിലുള്ളത്.