ഹാരിയുടെ ഭാര്യ മേഗൻ മാർകിളും സഹോദരൻ വില്യമിന്റെ ഭാര്യ കേയ്റ്റും തമ്മിലുള്ള നാത്തൂൻ പോര് വാർത്തകളിൽ നിറഞ്ഞ് നിൽക്കുന്ന സമയമാണല്ലോ ഇത്. ഇതിനിടെ ക്രിസ്മസിന് മുമ്പ് തർക്കം തീർക്കാൻ എലിസബത്ത് രാജ്ഞി കേയ്റ്റിനെ ബക്കിങ്ഹാം പാലസിലേക്ക് നേരിട്ട് വിളിപ്പിച്ചുവെന്ന വാർത്ത പുറത്ത് വിട്ട് പാപ്പരാസികൾ രംഗത്തെത്തി. രാജ്ഞിയെ കാണാനായി കേയ്റ്റ് കൊട്ടാരത്തിലേക്ക് ഒറ്റയ്ക്ക് റേഞ്ച് റോവർ ഓടിച്ചെത്തുന്നതെന്ന് അവകാശപ്പെടുന്ന വീഡിയോയും പാപ്പരാസികൾ പുറത്ത് വിട്ടിട്ടുണ്ട്. പാലസിന്റ ഗേറ്റുകളിലൂടെ വണ്ടിയോടിച്ച് വരുന്ന കേയ്റ്റിന്റെ ചിത്രമാണ് പുറത്ത് വന്നിരിക്കുന്നത്. ഇതിൽ അവർ ക്രീം കളറിലുള്ള ജാക്കറ്റണിഞ്ഞ് ആരാധകരോട് കൈവീശുന്നതായി കാണാം.

സൈപ്രസിലെ തിരക്കേറിയ സന്ദർശനം കഴിഞ്ഞതിന് ശേഷമാണ് തിടുക്കത്തിൽ കേയ്റ്റ് ബുധനാഴ്ച കൊട്ടാരത്തിലെത്തിയിരിക്കുന്നത്. ഇവിടെ വച്ച് അവർ രാജ്ഞിയുമൊത്ത് ചായ കഴിച്ച് ചർച്ച നടത്തിയെന്നും ഊഹാപോഹങ്ങളുണ്ട്. കേയ്റ്റിന്റെ മൂന്ന് കുട്ടികളിലൊരാളെ കാറിന്റെ ബാക്ക് സീറ്റിൽ ഇരുത്തിയിരുന്നുവെന്നും സൂചനയുണ്ട്. കേയ്റ്റ് കാറോടിച്ച് വന്നിറങ്ങുന്നതിന്റെ ഫൂട്ടേജ് നിരവധി രാജഭക്തരാണ് പകർത്തിയിരിക്കുന്നത്. ഇവർ അത് ഇൻസ്റ്റാഗ്രാമിലൂടെയും മറ്റും ഷെയർ ചെയ്യുകയും ചെയ്തിട്ടുണ്ട്. റോയൽ ഫാൻ അക്കൗണ്ടായ റൗരവലരൈമായൃശറഴല ലും ഈ ഫൂട്ടേജ് ഷെയർ ചെയ്തിട്ടുണ്ട്.

കേയ്റ്റിനോട് വളരെ അടുപ്പം പുലർത്തുന്ന രാജ്ഞി ഗർഭിണിയായ മേഗനും എല്ലാ വിധത്തിലുമുള്ള പിന്തുണയുമേകുന്നുണ്ടെന്നാണ് കൊട്ടാരവുമായി അടുത്ത വൃത്തങ്ങൾ വെളിപ്പെടുത്തുന്നത്. മേഗനും കേയ്റ്റും തമ്മിലുള്ള തെറ്റിദ്ധാരണകളും സൗന്ദര്യപ്പിണക്കങ്ങളും തെറ്റിദ്ധാരണകളും എത്രയും വേഗം അവസാനിപ്പിക്കാൻ ആഗ്രഹിക്കുന്നതും രാജ്ഞിയാണ്. അതിന് വേണ്ടി അവർ എല്ലാ വഴികളും സ്വീകരിച്ച് വരുന്നുവെന്നും റിപ്പോർട്ടുണ്ട്. എന്നാൽ മേഗനുമായുള്ള പിണക്കം കാരണം കേയ്റ്റിന് ക്രിസ്മസ് കടുത്ത അഗ്‌നിപരീക്ഷയായിരിക്കുമെന്നാണ് റോയൽ ബയോഗ്രാഫറായ ക്രിസ്റ്റഫർ വിൽസൻ പ്രവചിക്കുന്നത്.

രാജ്ഞി ആവശ്യപ്പെട്ടത് അനുസരിച്ച് കേയ്റ്റും മേഗനും കുടുംബസമേതം ഒരുമിച്ച് ക്രിസ്മസ് ആഘോഷിക്കുമെന്ന റിപ്പോർട്ട് പുറത്ത് വന്നതിനെ തുടർന്നാണ് വിൽസൻ ഈ മുന്നറിയിപ്പുമായി മുന്നോട്ട് വന്നിരിക്കുന്നതെന്നതും നിർണായകമാണ്. നിലവിൽ ഹാരിയുടെയും വില്യമിന്റെയും കുടുംബം രാജ്ഞിക്കൊപ്പം സാൻഡ്രിൻഗാമിൽ വച്ച് ക്രിസ്മസ് ആഘോഷിക്കുമെന്നാണ് റിപ്പോർട്ട്. എന്നാൽ അടുത്തിടെ നടന്ന സംഭവവികാസങ്ങൾ കൂട്ടി വായിക്കുമ്പോൾ കേയ്റ്റും മേഗനും തമ്മിലുള്ള അകൽച്ച വീണ്ടും വർധിച്ചിരിക്കുന്നുവെന്നും അതിനാൽ ഈ ക്രിസ്മസ് ആഘോഷം കണക്ക് കൂട്ടുന്നത് പോലെ എളുപ്പമായേക്കില്ലെന്നും വിൽസൻ പ്രവചിക്കുന്നു.

തങ്ങളുടെ കുഞ്ഞിനെ പ്രതീക്ഷിച്ചിരിക്കുന്ന മേഗനും ഹാരിയും കെൻസിങ്ടൺ പാലസിൽ നിന്നും ഫ്രോഗ്മോർ എസ്റ്റേറ്റിലേക്ക് താമസം മാറുന്നുവെന്ന വാർത്തയും അതിനിടെ പുറത്ത് വന്നിരുന്നു.