തിരുവനന്തപുരം: ആകാശവാണിയുടെ ആലപ്പുഴ നിലയം അടച്ചുപൂട്ടുന്നു. പ്രസാർഭാരതി ഡയറക്ടർ ജനറലാണ് ആലപ്പുഴ നിലയം ഉടൻ തന്നെ അടച്ചു പൂട്ടാൻ ഉത്തരവിട്ട് ഇന്നലെ ഉത്തരവിറക്കിയത്. ആലപ്പുഴയിലെ 200 കിലോ വാട്ട് മീഡിയം വേവ് ട്രാൻസ്മിറ്റർ ആണ് ഒഴിവാക്കുന്നത്. ഇതോടെ മധ്യ കേരളത്തിൽ ആകാശവാണിയുടെ പരിപാടികൾ മുടങ്ങും. ആലപ്പുഴ, കൊല്ലം, എറണാകുളം ,തൃശൂർ, പത്തനംതിട്ട ജില്ലകളിലൊക്കെ തിരുവനന്തപുരം ആകാശവാണി നിലയത്തിന്റെ പരിപാടികൾ കേൾപ്പിച്ചത് ആലപ്പുഴയിലെ ട്രാൻസ്മിറ്റർ ആയിരുന്നു. ഇത് ഒഴിവാക്കിയതോടെ തിരുവനന്തപുരം നിലയത്തിൽ നിന്നുള്ള വാർത്ത ഉൾപ്പെടെയുള്ള പരിപാടികൾ ഭൂരിഭാഗത്തിനും കേൾക്കാനാവില്ല.

തിരുവനന്തപുരത്തും പരിസരത്തും മാത്രം കേൾക്കാൻ കഴിയുന്നതാണ് തിരുവനന്തപുരത്ത് കുളത്തൂരിലുള്ള ട്രാൻസ്മിറ്രർ. ആലപ്പുഴ ട്രാൻസ്മിറ്ററിന്റെ കപ്പാസിറ്രി 200 കിലോ വാട്ട് ആണെങ്കിൽ തിരുവനന്തപുരത്തിന്റേത് 10 കിലോ വാട്ട് മാത്രമാണ്. ആലപ്പുഴയിൽ ശേഷിക്കുന്ന എഫ്.എം. ട്രാൻസ്മിറ്റർ വഴി ആറ് കിലോമീറ്റർ പരിധിയിലുള്ളവർക്ക് മാത്രമേ ആകാശവാണി പരിപാടി കേൾക്കാനാവൂ. തിരുവനന്തപുരം, കൊച്ചി, തൃശൂർ, കോഴിക്കോട്, മഞ്ചേരി, കണ്ണൂർ നിലയങ്ങൾ ഉണ്ടെങ്കിലും ഇവിടെ നിന്നുള്ള റിലേ മൂലം ചുറ്രുവട്ടത്തുള്ളവർക്ക് മാത്രമേ പരിപാടികൾ ശ്രവിക്കാൻ കഴിയൂ.  അല്ലെങ്കിൽ സ്മാർട്ട് ഫോണിൽ ആകാശ വാണിയുടെ ആപ്പ് ഡൗൺലോഡ് ചെയ്യണം.

നിലവിലുള്ള ട്രാൻസ്മിറ്രറിന്റെ ഉപയോഗിക്കാൻ കഴിയുന്ന ഭാഗം ഏതെന്ന് പരിശോധിച്ച് ആകാശ വാണിയുടെ മെയിന്റനൻസ് അഡി.ഡയറക്ടർ തീരുമാനമെടുക്കണമെന്ന് ഉത്തരവിൽ പറയുന്നു. മറ്ര് ഭാഗങ്ങൾ ഒഴിവാക്കുന്ന കാര്യം ആകാശവാണിയുടെ മാർഗനിർദ്ദേശ പ്രകാരം ചെയ്യണം. ബാക്കിയുള്ള ഭൂമി,കെട്ടിടം, ഇലക്ട്രിക് ഉപകരണങ്ങൾ, മാനവശേഷി എന്നിവയിൽ ഉചിതമായ തീരുമാനമെടുക്കണം.എന്ത് മാനദണ്ഡപ്രകാരമാണ് ആലപ്പുഴ ട്രാൻസ്മിറ്രർ ഒഴിവാക്കുന്നതെന്ന് ഉത്തരവിൽ പറയുന്നില്ല. ലക്ഷക്കണക്കിന് പേർ ഇപ്പോഴും ആകാശവാണി പരിപാടികൾ ശ്രവിക്കുന്നതൊന്നും ഉത്തരവിടുന്നവർ ശ്രദ്ധിക്കുന്നുമില്ല.

 

അടച്ചു പൂട്ടിആകാശവാണിആലപ്പുഴ നിിലയം