കോഴിക്കോട്: വീടിന്റെ അതിർത്തിയിലൂടെ റോഡ് വെട്ടുന്നതുമായി ബന്ധപ്പെട്ട തർക്കത്തിനിടയിൽ ബന്ധുവിന്റെ കുത്തേറ്റ യുവാവ് മരിച്ചു. കോഴിക്കോട് ചെമ്പനോട കിഴക്കരക്കാട്ട് സിജോ(35)യാണ് മരിച്ചത്. ഞായറാഴ്ച ഉച്ചയോടെയായിരുന്നു സംഭവം. കുത്തേറ്റ ഉടനെ സിജോയെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സിജോയുടെ ബന്ധുവും വീടിന് തൊട്ടടുത്ത് താമസിക്കുകയും ചെയ്യുന്ന ചാക്കോ എന്നയാളാണ് സിജോയെ ആക്രമിച്ചത്. സംഭവത്തിന് ശേഷം കടന്നുകളഞ്ഞ ഇയാൾക്കായി തിരച്ചിൽ തുടരുകയാണെന്ന് പെരുവണ്ണാമൂഴി പൊലീസ് പറഞ്ഞു. സിജോയുടെ വീടിന്റെ അതിർത്തിയിലൂടെ റോഡ് വെട്ടുന്നതുമായി ബന്ധപ്പെട്ട് ബന്ധുക്കൾ തമ്മിൽ കുറച്ചു നാളായി തർക്കംനിലനിന്നിരുന്നു.

ഞായറാഴ്ച ജെ.സി.ബി. എത്തി റോഡ് പണി ആരംഭിച്ചതോടെ ബന്ധുക്കൾ തമ്മിൽ വീണ്ടും തർക്കമുണ്ടാവുകയും കത്തിക്കുത്തിൽ കലാശിക്കുകയുമായിരുന്നു. ഗുരുതരമായി പരിക്കേറ്റ സിജോയെ പേരാമ്പ്രയിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സിജോയുടെ മരണത്തോടെ അച്ഛനും അമ്മയും ഭാര്യയും പിഞ്ചുകുഞ്ഞും അടങ്ങുന്ന കുടുംബമാണ് അനാഥമായത്. മൃതദേഹം പോസ്റ്റുമോർട്ടം നടപടികൾക്കായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.

 

കുത്തേറ്റയുവാവ് മരിച്ചു