ബസിനടിയിലേക്ക് ഗുഡ്‌സ് ഓട്ടോ ഇടിച്ചു കയറിയതോടെ രക്ഷാപ്രവർത്തനവും വൈകി; മലപ്പുറത്ത് ഗുഡ്‌സ് ഓട്ടോയും സ്വകാര്യ ബസും കൂട്ടിയിടിച്ചുണ്ടായ അപകടത്തിൽ മരിച്ച് മൂന്ന് പേരെയും പുറത്തെടുത്തത് ബസ് പൊക്കിയ ശേഷം ഓട്ടോയുടെ മുൻവശം പൊളിച്ചുമാറ്റി
മലപ്പുറം: മലപ്പുറത്ത് ഗുഡ്‌സ് ഓട്ടോയും സ്വകാര്യ ബസും കൂട്ടിയിടിച്ചുണ്ടായ അപകടത്തിൽ മരിച്ചത് മൂന്ന് പേർ. തിരൂർക്കാട്- ആനക്കയം റോഡിൽ വേരുംപുലാക്കലിൽ ഗുഡ്‌സ് ഓട്ടോയും സ്വകാര്യ ബസും കൂട്ടിയിടിച്ചുണ്ടായ അപകടത്തിലാണ് മൂന്ന് പേർ മരിച്ചത്. ഓട്ടോയിൽ യാത്രചെയ്തിരുന്ന കോഴിക്കോട് മുക്കം പുല്ലൂക്കാവിൽ സുരേഷ്ബാബു, അഗസ്ത്യന്മൂഴി വെങ്ങളത്ത് ഷിജു, പെരുമ്പടപ്പ് കോഴഞ്ചേരി മണി എന്നിവരാണു മരിച്ചത്.
ബസിനടിയിലേക്ക് ഗുഡ്‌സ് ഓട്ടോ ഇടിച്ചു കയറിയതോടെ രക്ഷാപ്രവർത്തനവും വൈകി. ചെടികളുമായി പോകുകയായിരുന്ന ഗുഡ്‌സ് ഓട്ടോയും പെരിന്തൽമണ്ണയിലേക്ക് പോകുകയായിരുന്ന ബസുമാണ് ഇന്നലെ 3.15ന് അപകടത്തിൽപെട്ടത്. ബസിനടിയിലേക്ക് ഗുഡ്‌സ് ഓട്ടോ ഇടിച്ചുകയറിയതിനെ തുടർന്ന് മൂന്ന് പേരും അരമണിക്കൂറോളം വാഹനത്തിൽ കുടുങ്ങിക്കിടന്നു. മണ്ണുമാന്തി യന്ത്രം ഉപയോഗിച്ച് ബസ് പൊക്കിയ ശേഷം ഓട്ടോയുടെ മുൻവശം പൊളിച്ചുമാറ്റിയാണ് ഇവരെ പുറത്തെടുത്തത്. പെരിന്തൽമണ്ണയിലെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
