റിയാദ്: സൗദിയിലെ വിമാനത്താവളത്തിന് നേരെ ഹൂതികളുടെ ആക്രമണം. അബ്ഹ വിമാനത്താവളത്തിനു നേരെയുണ്ടായ മിസൈൽ ആക്രമണത്തിൽ നിർത്തിയിട്ടിരുന്ന യാത്രാവിമാനത്തിന് തീപിടിച്ചതായി സൗദി സഖ്യസേന വ്യക്തമാക്കി. അതേസമയം പരുക്കുകളോ മറ്റു അപകടങ്ങളോ റിപ്പോർട്ട് ചെയ്തിട്ടില്ല. യെമൻ അതിർത്തിയിൽനിന്നും 120 കിലോമീറ്റർ അകലെയുള്ള അബ്ഹ വിമാനത്താവളത്തിനുനേരേ ഉച്ചയോടെയാണ് ആക്രമണമുണ്ടായത്.

ആക്രമണത്തെ ലോകരാഷ്ട്രങ്ങൾ അപലപിച്ചു. അതേസമയം ഇറാൻ പിന്തുണയോടെ ഹൂതി വിമതർ അയച്ച രണ്ടു സായുധഡ്രോണുകൾ ലക്ഷ്യത്തിലെത്തും മുൻപ് തകർത്തതായും സഖ്യസേന വക്താവ് കേണൽ തുർക്കി അൽ മാലികി വ്യക്തമാക്കി. സൗദിയിലെ ജനവാസകേന്ദ്രങ്ങൾക്കു നേരെ നടത്തുന്ന ആക്രമണങ്ങൾ ഹൂതികൾ അവസാനിപ്പിക്കണമെന്ന് യുഎസ് സ്റ്റേറ്റ് ഡിപ്പാർട്ട്‌മെന്റ് വക്താവ് നെഡ് പ്രൈസ് പറഞ്ഞു. ആക്രമണത്തെ യുഎസ്, ഫ്രാൻസ്, ജിസിസി, അറബ് രാജ്യങ്ങൾ തുടങ്ങിയവർ അപലപിച്ചു.

 

അബ്ഹ വിമാനത്താവളസൗദിഹൂതികളുടെ മിസൈൽ ആക്രമണം