ട്രെയിൻ കിട്ടാനായി കയ്യും കാലും കുത്തി നിരങ്ങി ഓടി അതിഥിത്തൊഴിലാളി; സ്‌ട്രെച്ചറുമായി പാഞ്ഞെത്തി ട്രെയിനിലെത്തിച്ച് പൊലീസുകാരും പോർട്ടർമാരും
തൃശൂർ: പട്‌ന എക്സ്‌പ്രസിൽ കയറുന്നതിന് വേണ്ടി പ്ലാറ്റ്‌ഫോമിലൂടെ കയ്യും കാലും കുത്തി നിരങ്ങി ഓടിയ അതിഥി തൊഴിലാളിക്ക് നേരെ കാരുണ്യം ചൊരിഞ്ഞ് പൊലീസുകാരും പോർട്ടർമാരും. ട്രെയിൻ രണ്ടാം പ്ലാറ്റ്‌ഫോമിലേക്കെത്താൻ നിമിഷങ്ങൾ മാത്രം ബാക്കി നിൽക്കെയാണ് ആ അതിഥിത്തൊഴിലാളി നിരങ്ങി ഓടിയത്. എത്ര വേഗത്തിൽ നീങ്ങിയാലും ട്രെയിൻ കിട്ടില്ലെന്നുറപ്പായിരുന്നു. ഈ സമയത്താണ് റെയിൽവേ പൊലീസിന്റെയും പോർട്ടർമാരുടെയും സഹായ ഹസ്തം നീണ്ടത്.
സ്‌ട്രെച്ചറുമായി പാഞ്ഞെത്തിയ സംഘം യാത്രക്കാരനെ അതിൽക്കിടത്തി പാളം മുറിച്ചു കടന്ന് രണ്ടാം പ്ലാറ്റ്‌ഫോമിലേക്ക് കുതിച്ചു. നിമിഷനേരം കൊണ്ടു ട്രെയിനെത്തി. അതിനുള്ളിലേക്ക് ആളെ കയറ്റിയതും വണ്ടി പുറപ്പെട്ടു.
കെട്ടിടം പണിക്കിടെ വീണ് നട്ടെല്ലിനു ഗുരുതരമായി പരുക്കേറ്റു നാട്ടിൽ ചികിത്സയ്ക്കായി പോകുന്ന പട്‌ന സ്വദേശിക്കാണ് റെയിൽവേ പൊലീസും പോർട്ടർമാരും കൈത്താങ്ങായത്. ചൊവ്വാഴ്ച വൈകിട്ട് 5.15 നു തൃശൂർ റെയിൽവേ സ്റ്റേഷനിലായിരുന്നു സംഭവം.
പൊലീസുകാരായ ലാലു മാരാത്ത്, സന്തോഷ്, പോർട്ടർമാരായ ബൈജു, ശെൽവൻ എന്നിവരാണ് സഹായവുമായി എത്തിയത്. ട്രെയിൻ പുറപ്പെട്ടു കഴിഞ്ഞപ്പോഴാണ് രോഗിയുടെ പേര് പോലും ചോദിച്ചില്ലല്ലോ എന്നു സംഘം ഓർത്തത്. ആ പ്രവൃത്തിയുടെ പേരാണല്ലോ കാരുണ്യം.
