അരിതയ്ക്ക് സമ്മാനവുമായി സലിംകുമാർ എത്തി; കെട്ടിവയ്ക്കാനുള്ള പണം നൽകി അനുഗ്രഹിച്ച് താരം: സലിംകുമാറിന്റെ കാലുതൊട്ടു വന്ദിച്ച് പത്രിക സമർപ്പിച്ച് അരിതാ ബാബു

കായംകുളം: കായംകുളത്തെ യുഡിഎഫ് സ്ഥാനാർത്ഥി അരിതാ ബാബുവിന് കെട്ടിവയ്ക്കാനുള്ള മുഴുവൻ തുകയും നൽകി നടൻ സലിംകുമാർ. ഇന്നലെ അരിത നാമനിർദേശപത്രിക സമർപ്പിച്ചപ്പോൾ സലിംകുമാറും സാക്ഷിയായി. സലിംകുമാറിന്റെ കാലുതൊട്ടു വന്ദിച്ച ശേഷമാണ് അരിത പത്രിക സമർപ്പിച്ചത്. അരിതയുടെ ജീവിതം അറിഞ്ഞപ്പോൾ തന്റെ പഴയകാലം ഓർത്തെന്നും അങ്ങനെയാണ് ഹൈബി ഈഡൻ എംപി വഴി അരിതയുമായി സംസാരിച്ചതെന്നും സലിംകുമാർ പറഞ്ഞു.

'പഠനകാലം മുതലേ പശുക്കളെ പരിപാലിക്കുകയും വീടുകളിൽ പാൽ എത്തിക്കുകയും ചെയ്യുന്ന അരിതയുടെ ജീവിതകഥ എന്നെ സമാനമായ അനുഭവം ഓർമിപ്പിച്ചു. അങ്ങനെ തന്നെയാണ് ഞാനും ജീവിച്ചത്. വീട്ടിൽ മൂന്നുനാലു പശുക്കൾ ഉണ്ടായിരുന്നു. പഠിക്കുന്ന സമയത്ത് വീടുകളിലും ഹോട്ടലുകളിലും പാൽ കൊണ്ടുപോയി കൊടുക്കുമായിരുന്നു' സലിംകുമാർ പറഞ്ഞു.