തിരുവനന്തപുരം: വോട്ടർ പട്ടികയിൽ യഥാർത്ഥ വോട്ടർമാർ മാത്രമേ ഉണ്ടാവൂ എന്ന് ഉറപ്പു വരുത്തുമെന്ന മുഖ്യതിരഞ്ഞെടുപ്പ് ഓഫീസർ ടിക്കാറാം മീണയുടെ പ്രസ്താവനയെ പ്രതിപക്ഷ നേതാവ് രമേശ് ചെന്നിത്തല സ്വാഗതം ചെയ്തു.

വോട്ടർ പട്ടികയിലെ ഇരട്ടിപ്പ് സംബന്ധിച്ച് തന്റെ പരാതി ശരിയാണെന്ന് തെളിഞ്ഞതായി മുഖ്യതിരഞ്ഞെടുപ്പ് ഓഫീസർ വ്യക്തമാക്കിയിട്ടുണ്ട്. അതിൽ സന്തോഷം. ഏതാണ്ട് മൂന്നേകാൽ ലക്ഷത്തോളം ഇരട്ട വോട്ടുകളാണ് യു.ഡി.എഫ് പ്രവർത്തകർ ഇതിനകം കണ്ടെത്തിയിട്ടുള്ളത്. ഇവയെല്ലാം ഒഴിവാക്കണം.

കാസർകോട്ടെ ഉദുമയിൽ ഒരു വോട്ടർക്ക് അഞ്ചു ഇലക്ടറൽ കാർഡുകൾ സൃഷ്ടിക്കപ്പെട്ട കാര്യം താൻ ഉദാഹരണമായി ചൂണ്ടിക്കാട്ടിയപ്പോൾ, 'അവർ കോൺഗ്രസുകാരിയാണ്, രമേശ് ചെന്നിത്തല വെട്ടിലായി' എന്നാണ് ചില മാധ്യമങ്ങൾ പോലും പരിഹസിച്ചത്. മുഖ്യമന്ത്രിയും ആ പരിഹാസം ഏറ്റെടുത്തിരുന്നു. ആ പരാതി ശരിയാണെന്ന് തെളിയുകയും ഉത്തരവാദിയായ അസിസ്റ്റന്റ് ഇലക്ട്രറൽ ഓഫീസറെ സസ്പെന്റ് ചെയ്യുകയും ചെയ്തിട്ടുണ്ട്.

വോട്ടേഴ്സ് ലിസ്റ്റിൽ ഇരട്ടിപ്പുണ്ടാക്കുന്നതും കൃത്രിമം നടത്തുന്നതും ആ വോട്ടർ അറിയാതെയാകാമെന്ന് തുടക്കം മുതൽ താൻ ചൂണ്ടികാണിച്ചതാണ്. അതും ശരിയാണെന്ന് തെളിഞ്ഞു. മുഖ്യമന്ത്രിയുടെ കീഴിലുള്ള ഭരണസംവിധാനം വഴിയാണ് ഈ ക്രമക്കേട് നടന്നത്. അത് ചൂണ്ടിക്കാട്ടിയതിന് പരിഹസിച്ചത് മുഖ്യമന്ത്രിയുടെ ജാള്യത മറയ്ക്കാനാണെന്ന് രമേശ് ചെന്നിത്തല പറഞ്ഞു.

രമേശ് ചെന്നിത്തല