ആന്റി കറപ്ഷൻ ഇൻഡക്‌സിന്റെ പുതിയ പതിപ്പ് ഈ വർഷം വീണ്ടും അവതരിപ്പിക്കും; കൂടുതൽ കൃത്യതയും സമഗ്രതയും യാഥാർത്ഥ്യമാക്കും; അഴിമതിയുടെ തോത് കണ്ടെത്താൻ ഉറച്ച് ജേക്കബ് തോമസ്
ഇരിങ്ങാലക്കുട: സർവ്വീസിലിരിക്കെ, താൻ തയ്യാറാക്കി വാർത്താ പ്രാധാന്യം നേടിയ ആന്റി കറപ്ഷൻ ഇൻഡക്‌സിന്റെ പുതിയ പതിപ്പ് ഈ വർഷം അവതരിപ്പിക്കുമെന്ന് മുൻ ഡിജിപിയും ഇരിങ്ങാലക്കുട നിയോജക മണ്ഡലം എൻഡിഎ സ്ഥാനാർത്ഥിയുമായ ഡോ. ജേക്കബ് തോമസ്.
വിവിധ സർക്കാർ വകുപ്പുകളിലെ അഴിമതിയുടെ തോത് ശാസ്ത്രീയമായി പരിശോധിക്കുന്ന, കേരള ആന്റി കറപ്ഷൻ ഇൻഡക്‌സിൽ 2017 ൽ ഒന്നാം സ്ഥാനത്തെത്തിയത് തദ്ദേശ സ്വയം ഭരണ വകുപ്പായിരുന്നു. തൊട്ടുപിന്നിൽ റവന്യൂ വകുപ്പെത്തി. അന്നത്തെ തദ്ദേശസ്വയംഭരണ വകുപ്പ് മന്ത്രി കെ.ടി. ജലീലിനെ കാര്യങ്ങൾ ബോധ്യപ്പെടുത്തിയപ്പോൾ, പരിഹാര മാർഗ്ഗങ്ങൾ നിർദേശിക്കാൻ അദ്ദേഹം ആവശ്യപ്പെട്ടുവെന്നും ശാസ്ത്രീയപഠനങ്ങളുടെ അടിസ്ഥാനത്തിൽ സമർപ്പിച്ച 26 നിർദ്ദേശങ്ങളിൽ ഒന്നു പോലും നടപ്പായില്ലെന്നും ജേക്കബ് തോമസ് പറഞ്ഞു. ഇരിങ്ങാലക്കുടയിലെ പ്രഗൽഭരായ പ്രൊഫഷണലുകളുമായി തന്റെ വികസന കാഴ്ചപ്പാടുകൾ പങ്കു വെക്കുന്ന പരിപാടിയിൽ പങ്കെടുക്കാനെത്തിയതായിരുന്നു അദ്ദേഹം.
ഈ വർഷം അവസാനത്തോടെ തയ്യാറാക്കുന്ന പുതിയ കേരള ആന്റി കറപ്ഷൻ ഇൻഡക്‌സിൽ കൂടുതൽ കൃത്യതയും സമഗ്രമായ വിലയിരുത്തലുകളും യഥാർത്ഥ്യമാക്കുന്നതിന് 100 ഓളം വിദദ്ധരുടെ നേതൃത്വത്തിൽ പ്രാരംഭ നടപടികൾ തുടങ്ങിയതായും അദ്ദേഹം വെളിപ്പെടുത്തി. പഴയതിനെ അപേക്ഷിച്ച് കൂടുതൽ രംഗങ്ങളിലേക്ക് വ്യാപിച്ച അഴിമതിയുടെ തോത് വിശകലന വിധേയമാക്കുമെന്നും ജേക്കബ് തോമസ് പറഞ്ഞു.
