ദുബായ്: കുഞ്ഞ് പിറന്നതിന്റെ സന്തോഷം പടക്കം പൊട്ടിച്ച് ആഘോഷിച്ച പിതാവ് പിടിച്ചത് പുലിവാൽ. പടക്കം പൊട്ടിച്ചുള്ള ആഘോഷം അതിര് കടന്നപ്പോൾ അബദ്ധത്തിൽ അഗ്നിക്കിരയായത് അയൽവാസികളുടെ വീടിന്റെ പൂമുഖവും അയൽക്കാരുടെ അഞ്ച് കാറുകളും. പടക്കത്തിൽ നിന്നും തീ പടർന്ന് വൻ നാശ നഷ്ടം ഉണ്ടാവുകയായിരുന്നു. ഇതോടെ യുവാവിനെയും സുഹൃത്തുക്കളായ 2 പേരെയും ദുബായ് പൊലീസ് അറസ്റ്റ് ചെയ്തു.

ഊദ് അൽ മുത്തീനയിലായിരുന്നു സംഭവം. പടക്കങ്ങൾ കത്തിച്ചും കരിമരുന്ന് പ്രയോഗം നടത്തിയുമായിരുന്നു യുവാവിന്റെ ആഘോഷം. ഇതോടെ സംഭവം കൈവിട്ടു പോകുക ആയിരുന്നു. കരിമരുന്നിൽ നിന്നും തീ പടർന്ന് അയൽപക്കത്തെ വീടുകളുടെ പൂമുഖവും അവിടെ നിർത്തിയിട്ടിരുന്ന കാറുകളും അഗ്‌നിക്കിരയാവുകയുമായിരുന്നു. ലക്ഷക്കണക്കിന് രൂപയുടെ നാശനഷ്ടമാണ് ഉണ്ടായത്.

ഉടൻ സ്ഥലത്തെത്തിയ സിവിൽ ഡിഫൻസ് സംഭവ സ്ഥലം സുരക്ഷിതമാക്കിയതായി ഖിസൈസ് പൊലീസ് സ്റ്റേഷൻ ഡയറക്ടർ ബ്രി.ജനറൽ അബ്ദുൽ ഹാലിം അൽ ഹാഷിമി പറഞ്ഞു. സംഭവത്തിനു ശേഷം പടക്കങ്ങൾ ഒളിപ്പിച്ചുവച്ചതിനാണ് സുഹൃത്തുക്കളായ രണ്ടു പേരെ പൊലീസ് അറസ്റ്റ് ചെയ്തത്. പടക്കങ്ങൾ ഉപയോഗിക്കുന്നതിനെതിരെ പൊലീസ് പൊതുജനങ്ങൾക്ക് മുന്നറിയിപ്പ് നൽകി.

 

കാറുകൾ