ബന്ധുവിന് ഓക്സിജൻ സിലണ്ടർ ആവശ്യമുണ്ടെന്ന് സുരേഷ് റെയ്ന; പത്ത് മിനറ്റിനുള്ളിൽ എത്തുമെന്ന് മറുപടി നൽകി സോനു സൂദ്
മീററ്റ്: ബോളിവുഡ് സ്റ്റാർ ആണൈങ്കിലും ചാരിറ്റി പ്രവർത്തനവുമായി മുന്നോട്ട് പോകുന്ന താരമാണ് സോനൂ സൂദ്. ഈ കോവിഡ് കാലത്ത് അദ്ദേഹം ചെയ്ത നല്ല കാര്യങ്ങൾ നാടിന് വിസ്മരിക്കാൻ കഴിയില്ല. രാജ്യത്ത് കോവിഡിന്റെ രണ്ടാം തരംഗം രൂക്ഷമാവുമ്പോഴും വിവിധ പ്രദേശങ്ങളിൽ സഹായവുമായി സോനു സൂദും അദ്ദേഹത്തിന്റെ ചാരിറ്റി ഫൗണ്ടേഷനും രംഗത്തുണ്ട്.
ഇപ്പോഴിതാ കോവിഡ് ബാധിച്ച തന്റെ ബന്ധുവിനായി ഓക്സിജൻ സിലിണ്ടർ ആവശ്യപ്പെട്ട മുൻ ഇന്ത്യൻ താരം സുരേഷ് റെയ്നയ്ക്കും സഹായം എത്തിച്ചിരിക്കുകയാണ് സോനു. റെയ്‌നയുടെ ട്വീറ്റിന് പിന്നാലെയാണ് സോനു ഓക്സിജൻ സിലണ്ടർ എത്തിച്ചു നൽകിയത്.
മീററ്റിലുള്ള കോവിഡ് ബാധിച്ച തന്റെ 65 വയസുകാരിയായ ബന്ധുവിന് അടിയന്തരമായി ഓക്സിജൻ സിലിണ്ടർ ആവശ്യമുണ്ടെന്ന് റെയ്ന വ്യാഴാഴ്ച ട്വീറ്റ് ചെയ്തിരുന്നു. യു.പി മുഖ്യമന്ത്രി യോഗി ആദിത്യനാഥിനെ ടാഗ് ചെയ്തുകൊണ്ടുള്ളതായിരുന്നു താരത്തിന്റെ ട്വീറ്റ്. എന്നാൽ ഉടൻ തന്നെ 10 മിനിറ്റിനുള്ളിൽ സിലിണ്ടർ എത്തുമെന്ന സോനു സൂദിന്റെ മറുപടിയെത്തി.
കഴിഞ്ഞ ദിവസം ബെംഗളൂരുവിലെ അരക് (ARAK) ആശുപത്രിയിലെ കോവിഡ് രോഗികൾക്ക് ഓക്സിജൻ ലഭ്യമാകാത്ത സാഹചര്യം ഉണ്ടാകുകയും പ്രശ്നം മനസിലാക്കി സോനുവും സംഘവും ഓക്സിജൻ സിലിണ്ടറുകൾ എത്തിച്ചുകൊടുക്കുന്ന പ്രവർത്തനത്തിൽ ഏർപ്പെടുകയുമുണ്ടായത് വലിയ വാർത്തയായിരുന്നു.
