ശക്തമായി പ്രവർത്തനം തുടരുക; ഇന്ത്യയിലെ ആരോഗ്യപ്രവർത്തകരെ പ്രശംസിച്ച് മാർപാപ്പ

വത്തിക്കാൻ: കോവിഡ് പ്രതിരോധത്തിൽ ഇന്ത്യയിലെ ആരോഗ്യപ്രവർത്തകരെ പ്രശംസിച്ച് ഫ്രാൻസിസ് മാർപാപ്പ. ശക്തമായി പ്രവർത്തനം തുടരാനും ഇന്ത്യയിൽ നടന്ന ബിഷപ്പുമാരുടെ സമ്മേളനത്തിന് നൽകിയ സന്ദേശത്തിൽ ആരോഗ്യപ്രവർത്തകരോട് മാർപാപ്പ ആവശ്യപ്പെട്ടു.

'ഡോക്ടർമാർ, നഴ്സുമാർ, ആശുപത്രിയിലെ മറ്റു ജീവനക്കാർ, ആംബുലൻസ് ഡ്രൈവർമാർ ഉൾപ്പെടെ തങ്ങളുടെ സഹോദരി സഹോദരന്മാരുടെ ആവശ്യങ്ങൾ പരിഹരിക്കാൻ അക്ഷീണം പ്രവർത്തിക്കുന്നവരെ ഞാൻ അഭിനന്ദിക്കുന്നു'- അദ്ദേഹം പറഞ്ഞു.

ഹൃദയംഗമമായ ഐക്യദാർഢ്യവും ആത്മീയമായ സാമീപ്യവും ഇന്ത്യയിലെ ജനങ്ങൾക്ക് വാഗ്ദാനംചെയ്യുന്നു. രോഗബാധിതർ, അവരുടെ കുടുംബാംഗങ്ങൾ, രോഗികളെ പരിചരിക്കുന്നവർ, തങ്ങളുടെ പ്രിയപ്പെട്ടവരുടെ വിയോഗത്തിൽ വേദനിക്കുന്നവർ എന്നിവർക്കൊപ്പമാണ് തന്റെ ചിന്തകൾ സഞ്ചരിക്കുന്നതെന്നും മാർപാപ്പ വ്യക്തമാക്കി.