ഗുരുഗ്രാം: ഹരിയാനയിൽ ആൾക്കൂട്ട ആക്രമണത്തിൽ യുവാവ് കൊല്ലപ്പെട്ടു. മേവാത്തിലുണ്ടായ ആക്രമണത്തിൽ ജിം പരിശീലകനായ ആസിഫ് ഖാൻ (25) ആണു കൊല്ലപ്പെട്ടത്. ഗുരുതരമായി പരിക്കേറ്റ ബന്ധുക്കളായ രണ്ട് യുവാക്കളെ ആശുപത്രിയിൽ പ്രവേശിപ്പിച്ചു. നുഹിലെ ഖലീൽപുരിൽ ഞായറാഴ്ച രാത്രിയാണു സംഭവം നടന്നത്.

മേവാദിലെ നുഹിൽ നിന്ന് മരുന്നു വാങ്ങി മടങ്ങുന്നതിനിടെ ഇവർ സഞ്ചരിച്ച വാഹനം 15 പേരടങ്ങുന്ന സംഘം വഴിയിൽ തടഞ്ഞ് മർദിക്കുകയായിരുന്നു. ആസിഫിന്റെ മൃതദേഹം കിലോമീറ്ററുകൾ അകലെ സോനയിലെ ഗ്രാമത്തിൽ ഉപേക്ഷിച്ച നിലയിലാണു കണ്ടെത്തിയത്. സംഭവത്തെ തുടർന്നു നാട്ടുകാർ ഗുരുഗ്രാം ആൽവർ റോഡ് ഉപരോധിച്ചു. പൊലീസിനു നേരെ കല്ലേറുണ്ടായി. സ്ഥിതി നിയന്ത്രണവിധേയമാണെങ്കിലും സംഘർഷാവസ്ഥ നിലനിൽക്കുകയാണ്.

6 പേരെ അറസ്റ്റ് ചെയ്തതായും 8 പേർക്കെതിരെ കൂടി കേസെടുത്തതായും പൊലീസ് അറിയിച്ചു. ഇരുവിഭാഗങ്ങൾ തമ്മിലുള്ള ശത്രുതയാണു സംഭവത്തിനു പിന്നിലെന്നാണു പൊലീസിന്റെ വിശദീകരണം.

 

ആൾക്കൂട്ട ആക്രമണം