ഭർത്തൃഗൃഹത്തിൽ തീപ്പൊള്ളലേറ്റു മരിച്ചനിലയിൽ കണ്ടെത്തിയത് സ്വകാര്യ ആശുപത്രിയിലെ സ്റ്റാഫ് നഴ്‌സിനെ; മൃതദേഹം കണ്ടെത്തിയത് വീട്ടിലെ അടുക്കളയിൽ കത്തിക്കരിഞ്ഞനിലയിൽ: മരണം നടന്നത് മക്കളെ ബന്ധുവീട്ടിൽ ട്യൂഷന് അയച്ചതിന് പിന്നാലെ
കൊല്ലം: കൊല്ലത്ത് സ്വകാര്യ ആശുപത്രിയിലെ സ്റ്റാഫ് നഴ്‌സിനെ ഭർത്തൃഗൃഹത്തിൽ തീപ്പൊള്ളലേറ്റു മരിച്ചനിലയിൽ കണ്ടെത്തി. ഇളമ്പൽ എലിക്കോട് ഉറിക്കോട് അജിഭവനിൽ അജിയുടെ ഭാര്യ ലിജി ജോൺ (34) അണ് പൊള്ളലേറ്റ് മരിച്ചത്. ചൊവ്വാഴ്ച വൈകീട്ട് നാലുമണിയോടെയാണ് വീട്ടിലെ അടുക്കളയിൽ കത്തിക്കരിഞ്ഞനിലയിൽ മൃതദേഹം കണ്ടത്. സംഭവ സമയത്ത് വീട്ടിൽ മറ്റാരും ഉണ്ടായിരുന്നില്ല. മരണ കാരണം വ്യക്തമല്ല.
ഒൻപതും അഞ്ചും വയസ്സുള്ള മക്കൾ ആരോണിനെയും ആബേലിനെയും സമീപത്തെ ബന്ധുവീട്ടിൽ ട്യൂഷന് അയച്ച ശേഷമാണ് മരണം സംഭവിച്ചത്. കുട്ടികൾ മടങ്ങിയെത്തി വീട്ടിൽ പ്രവേശിക്കാൻ ശ്രമിച്ചെങ്കിലും കതക് തുറക്കാനായില്ല. തുടർന്ന് ബന്ധുവിനെ കൂട്ടി വീട്ടിൽ എത്തി ഇവരുടെ സഹായത്തോടെ ഉള്ളിൽ കടന്നപ്പോഴാണ് അടുക്കളയിൽ മൃതദേഹം കണ്ടത്. ലിജിയുടെ ഭർത്തൃമാതാപിതാക്കൾ സംഭവസമയം തൊഴിലുറപ്പ് ജോലിക്കായി പുറത്തായിരുന്നു. ഭർത്താവ് അജി കൊട്ടിയത്തെ സ്വകാര്യ ആശുപത്രിയിൽ നഴ്‌സാണ്. അജിയും വീട്ടിലുണ്ടായിരുന്നില്ല.
എന്നാൽ മരണം സംഭവിച്ചത് എങ്ങനെ എന്ന് ക്യത്യമായി വ്യക്തമായിട്ടില്ല. ശരീരത്തിൽ മണ്ണെണ്ണയൊഴിച്ച് തീകൊളുത്തി ആത്മഹത്യ ചെയ്തതാകാമെന്ന നിഗമനത്തിലാണ് പൊലീസ്. പുനലൂരിലെ സ്വകാര്യ ആശുപത്രിയിൽ സ്റ്റാഫ് നഴ്‌സായിരുന്ന ലിജി ഏതാനും ദിവസങ്ങളായി അവധിയിലായിരുന്നു. കൊട്ടാരക്കരയിൽ ഐ.ഇ.എൽ.ടി.എസ്.കോഴ്‌സിനു ചേർന്ന് ഓൺലൈൻ ക്ലാസുകളിൽ പങ്കെടുത്തുവരികയായിരുന്നു. ആത്മഹത്യയുടെ കാരണം വ്യക്തമല്ല. പുനലൂർ പൊലീസ് ഇൻക്വസ്റ്റ് നടപടികൾ പൂർത്തിയാക്കി മൃതദേഹം പുനലൂർ താലൂക്കാശുപത്രി മോർച്ചറിയിലേക്ക് മാറ്റി. ലിജി മൈലം സ്വദേശിനിയാണ്.
