പാലാ: ആദിവാസികൾക്കിടയിലെ മനുഷ്യാവകാശ പ്രവർത്തകനായിരുന്ന ഫാ സ്റ്റാൻസ്വാമിയുടെ ജനാധിപത്യ രാജ്യത്തെ മരണം ഞെട്ടിക്കുന്നതാണെന്ന് മാണി സി കാപ്പൻ എം എൽ എ പറഞ്ഞു. ആയിരം കുറ്റവാളികൾ രക്ഷപെട്ടാലും ഒരു നിരപരാധിപോലും ശിക്ഷിക്കപ്പെടരുതെന്ന നീതിയുടെ ആപ്തവാക്യത്തിന് പരിഗണന കൊടുക്കുന്ന ഇന്ത്യയിൽ ഫാ സ്റ്റാൻ സ്വാമി നീതി ലഭിക്കാതെയാണ് മരണപ്പെട്ടത്. തന്റെ നിരപരാധിത്വം തെളിയിക്കാൻ പോലും അവസരം നൽകാതെ അദ്ദേഹത്തെ വേട്ടയാടുകയാണ് ചെയ്തത്. ഫാ സ്റ്റാൻ സ്വാമിയുടെ മരണത്തിനിടയാക്കിയ സംഭവത്തെക്കുറിച്ച് സമഗ്ര അന്വേഷണം അനിവാര്യമാണെന്നും മാണി സി കാപ്പൻ പറഞ്ഞു. ഈ സംഭവത്തിനെതിരെ രാജ്യം ഒറ്റ ജനതയായി ശബ്ദിക്കണമെന്നും അദ്ദേഹം ആവശ്യപ്പെട്ടു.

ക്ഷീര കർഷകർക്ക് പ്രത്യേക പാക്കേജ് പ്രഖ്യാപിക്കണം: മാണി സി കാപ്പൻ

പാലാ: കോവിഡുമായി ബന്ധപ്പെട്ടു ദുരിതമനുഭവിക്കുന്ന ക്ഷീരകർഷകർക്കു പ്രത്യേക പാക്കേജ് സർക്കാർ പ്രഖ്യാപിക്കണമെന്നും ക്ഷീരസംഘം ജീവനക്കാർക്കു പ്രത്യേക പരിഗണന നൽകണമെന്നും മാണി സി കാപ്പൻ എം എൽ എ ആവശ്യപ്പെട്ടു. കോവിഡ് കാലത്തും കർഷകർക്കൊപ്പം നിന്നു പ്രവർത്തിച്ച ചക്കാമ്പുഴ ക്ഷീര സംഘത്തിലെ ജീവനക്കാരെ ആദരിക്കുന്ന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

സംഘം പ്രസിഡന്റും മിൽമ ബോർഡ് മെമ്പറുമായ സോണി ഈറ്റയ്ക്കൽ അധ്യക്ഷത വഹിച്ചു. ക്ഷീരവകുപ്പ് ഡപ്യൂട്ടി ഡയറക്ടർ സിൽവി മാത്യു, അഡ്വ ജോണി ജോസഫ്, ജോമോൻ മറ്റം, ലൈസാമ്മ ജോർജ്, പി വി ലതീഷ്‌കുമാർ, ഡോ ഗിരീഷ്, ഡോമിനിക് പുളിക്കപ്പടവിൽ, അമ്പിളി എൻ പി എന്നിവർ പ്രസംഗിച്ചു.

പാലാ മരിയൻ സെന്ററിൽആധുനിക ഓപ്പറേഷൻ തിയേറ്റർ കോംപ്ലെക്‌സ് ഉദ്ഘാടനം ഇന്ന്

പാലാ: പാലാ മരിയൻ മെഡിക്കൽ സെന്ററിലെ ആധുനിക ഓപ്പറേഷൻ തിയേറ്റർ കോംപ്ലെക്‌സിന്റെ ഉദ്ഘാടനവും വെഞ്ചിരിപ്പും ഇന്ന് (07/07/2021) നടക്കുമെന്ന് അഡ്‌മിനിസ്‌ട്രേറ്റർ സിസ്റ്റർ ഷേർളി ജോസ് അറിയിച്ചു. രാവിലെ 11ന് പാലാ രൂപതാ ബിഷപ്പ് മാർ ജോസഫ് കല്ലറങ്ങാട്ട് ഉദ്ഘാടനവും വെഞ്ചിരിപ്പും നിർവ്വഹിക്കും. ഫാ ജോർജ് ഞാറക്കുന്നേൽ, പ്രൊവിൻഷ്യാൾ സിസ്റ്റർ ഗ്രേസ് മുണ്ടപ്ലാക്കൽ എന്നിവർ പങ്കെടുക്കും.

ആധുനിക സജ്ജീകരണങ്ങളോടുകൂടിയ അഞ്ച് പുതിയ ഓപ്പറേഷൻ തിയേറ്ററുകളാണ് കോംപ്ലെക്‌സിൽ സ്ഥാപിച്ചിരിക്കുന്നത്. പ്രീ ഓപ്പറേറ്റീവ് റൂമുകളും പോസ്റ്റ് ഓപ്പറേറ്റീവ് റൂമുകളും തിയേറ്ററുകൾക്കു അനുബന്ധമായി സജ്ജീകരിച്ചിട്ടുണ്ട്.

മാണി സി കാപ്പൻ