റീത്തും യൂറോപ്യൻ ക്ലോസറ്റും പാചക വാതക സിലിണ്ടറും വാഹനത്തിന് മുകളിൽ കയറ്റി വച്ച് പ്രതിഷേധം; കോതമംഗലം നെല്ലിക്കുഴിയിൽ അലിയുടെ ഒറ്റയാൾ സമരം

കോതമംഗലം : സ്വന്തം വാഹനം നടുറോഡിൽ നിർത്തിയിട്ട്, റീത്തും യൂറോപ്പ്യൻ ക്ലോസറ്റും, പാചക വാതക സിലിണ്ടറും വാഹനത്തിന് മുകളിൽ കയറ്റി വച്ച് നെല്ലിക്കുഴിയിൽ അലി നടത്തിയ ഒറ്റയാൾ സമരം ശ്രദ്ധേയമായി. തുടർച്ചയായ ദിവസങ്ങളിൽ തുടരുന്ന ഇന്ധന വില വർദ്ധനവിലും, സബ്സിഡി എടുത്തുകളഞ്ഞു കൊണ്ടു പാചക വാതകത്തിനു കുത്തനെ വില വർധിപ്പിച്ചതിലും പ്രതിഷേധിച്ചായിരുന്നു അലിയുടെ വേറിട്ട സമരം.

ഈ കോവിഡ് മഹാമാരിയിൽ പോലും സാധാരണക്കാരെ ബുദ്ധിമുട്ടിക്കുകയും നിത്യോപയോഗ സാധനങ്ങൾക്ക് വൻ വിലക്കയറ്റത്തിനുപോലും കാരണമായ സർക്കാർ നടപടിക്കെതിരെയാണ് നെല്ലിക്കുഴി കവലയിൽ ഇലക്ട്രിക് ഷോപ്പ് നടത്തുന്ന ഇരമല്ലൂർ സ്വദേശി പട്ടലായി അലി സ്വന്തം വാഹനം സമരയുധമാക്കി പ്രതിഷേധിച്ചത്.

ഇത്തരം പകൽ കൊള്ളക്കെതിരെ മുഴുവൻ ആളുകളും തെരുവിൽ ഇറങ്ങി പ്രതിഷേധിക്കാൻ തയ്യാറായാൽ സർക്കാരുകൾ കണ്ണു തുറക്കും എന്നാണ് അലി പറയുന്നത്. ഏതായാലും അലിയുടെ വേറിട്ട ഈ ഒറ്റയാൾ സമരം നാട്ടിലെങ്ങും ചർച്ചയായിട്ടുണ്ട്.