റൈറ്റ് റവ. ഡോ യുയാക്കിം മാർ കൂറിലോസ് ,റൈറ്റ് റവ ജോസഫ് മാർ ബർണബാസ് എപ്പിസ്‌കൊപ്പാമാരുടെ സഫ്രഗൻ മെത്രാപ്പൊലീത്ത സ്ഥാനാരോഹണം ഞായറാഴ്ച
ന്യൂയോർക് : നോർത്ത് അമേരിക്ക യൂറോപ്പ് മാർത്തോമാ മുൻ ഭദ്രാസനാധിപനും ഇപ്പോൾ കൊട്ടാരക്കര ഭദ്രാസനത്തിന്റെ ചുമതല വഹിക്കുന്ന റൈറ്റ് റവ. ഡോ. യുയാക്കിം മാർ കൂറിലോസ് , തിരുവനന്ത പുരം ഭദ്രാസനത്തിന്റെ ചുമതല വഹിക്കുന്ന റൈറ്റ് റവ ജോസഫ് മാർ ബർണബാസ് എന്നീ എപ്പിസ്‌കൊപ്പാമാരുടെ സഫ്രഗൻ മെത്രാപ്പൊലീത്ത സ്ഥാനാരോഹണം ജൂലൈ 18-നു ഞായറാഴ്ച രാവിലെ 9 മണിക്ക് തിരുവല്ലയിലെ സഭാ ആസ്ഥാനത്തനുള്ള പുലാത്തീൻ അരമന ചാപ്പലിൽ വച്ചു നടത്തപ്പെടുന്നു
മലങ്കര മാർത്തോമാ സുറിയാനി സഭയ്ക്ക് രണ്ട് പുതിയ സഫ്രഗൻ മെത്രാപ്പൊലീത്തമാരെ നിയോഗിക്കാൻ ജൂലൈ 16-നു തിരുവല്ലയിൽ ഡോ. തിയോഡോഷ്യസ് മാർത്തോമായുടെ അധ്യക്ഷതയിൽ കൂടിയ എപ്പിസ്‌കോപ്പൽ സിനഡാണ് തീരുമാനിച്ചത് .
ഞായറാഴ്ച രാവിലെ 9 മണിക്ക് അഭിവന്ദ്യ മാർത്തോമാ മെത്രാപൊലീത്ത ഡോ. തിയോഡോഷ്യസ് മാർത്തോമായുടെ മുഖ്യ കാർമികത്വത്തിൽ നടക്കുന്ന വിശുദ്ധ കുർബാന മധ്യേ നടക്കുന്ന സ്ഥാനാരോഹ ശുശ്രുഷയിൽ റൈറ്റ് റവ. തോമസ് മാർ തിമോഥെയോസ് എപ്പിസ്‌കോപ്പ വചന ശുശ്രൂഷ നിർവഹിക്കും സഭയിലെ മറ്റ് ബഹുമാനപ്പെട്ട എപ്പിസ്‌കോപ്പമാരും സഹകാർമികരായിരിക്കും.
1951നവംബർ 25 നു കുന്നംകുളം ചീരൻ കുടുംബത്തിൽ ജനിച്ച റൈറ്റ് റവ. ഡോ. യുയാക്കിം മാർ കൂറിലോസ് 1978 ലാണ് സഭയിലെ പട്ടത്വ ശുശ്രുഷയിൽ പ്രവേശിച്ചത്. 1989 ഡിസംബർ 9 നു സഭയിലെ എപ്പിസ്‌കോപയായി അവരോധിക്കപ്പെട്ടു .
1949 സെപ്റ്റംബർ 8 നു അഞ്ചേരി ക്രിസ്റ്റോസ് പാരിഷ് ഏലക്കാട്ടു കടുപ്പിൽ ജെ ക്കബിന്റേയും സാറാമ്മയുടെയും മകനായി ജനിച്ച റൈറ്റ് റവ ജോസഫ് മാർ ബർണബാസ് 1976 ജൂൺ 12 നാണു സഭയിലെ പട്ടത്വ ശുശ്രുഷയിൽ പ്രവേശിച്ചത്.
1993 ഒക്ടോബർ 2 നു സഭയിലെ എപ്പിസ്‌കോപയായി അവരോധിക്കപ്പെട്ടു .
മദ്രാസ് മാർത്തോമാ (ചെട്ട്പെട്ട്) ഇടവക വികാരിയായ റവ. ജോർജ് മാത്യുവിന്റെ വികാരി ജനറാൾ നിയോഗ ശുശ്രൂഷയും ഇതോടൊപ്പം തന്നെ നടത്തപ്പെടുന്നു. ശുശ്രൂഷകൾ കോവിഡ് പ്രോട്ടോക്കോൾ പാലിച്ചുള്ളതായിരിക്കുമെന്നും , സഭയുടെ വെബ്സൈറ്റിലൂടെയും സമൂഹ മാധ്യമങ്ങളിലൂടെയും വെബ്കാസ്റ്റ് ചെയ്യുന്നതാണെന്നും സഭാസെക്രട്ടറിയുടെ അറിയിപ്പിൽ പറയുന്നു.
