36 വർഷത്തെ സേവനത്തിളക്കം; ജയിൽ ഡിജിപി ഋഷിരാജ് സിങ് സർവീസിൽ നിന്നും വിരമിച്ചു

തിരുവനന്തപുരം: ജയിൽ ഡിജിപി ഋഷിരാജ് സിങ് സർവീസിൽ നിന്നും വിരമിച്ചു. 36 വർഷത്തെ സേവനത്തിന് ശേഷമാണ് അദ്ദേഹം സർവീസിൽ നിന്നും വിരമിക്കുന്നത്. സംസ്ഥാന പൊലീസിൽ വിവിധ വിഭാഗങ്ങളുടെ തലവനായി പ്രവർത്തിച്ചിരുന്ന അദ്ദേഹത്തിന് വിജിലൻസ് ഡയറക്ടർ, സംസ്ഥാന പൊലീസ് മേധാവി എന്നീ പദവികൾ മാത്രമാണ് ലഭിക്കാതിരുന്നത്.

ഋഷിരാജ് സിങ് ഇന്ന് പേരൂർക്കട എസ്എപി ക്യാമ്പ് ഗ്രൗണ്ടിൽ വിടവാങ്ങൽ പരേഡിൽ പൊലീസ് സേനയുടെ അഭിവാദ്യം സ്വീകരിച്ചു. മൂന്നാർ ദൗത്യം ഉൾപ്പെടെ സർക്കാർ ഏൽപ്പിച്ച പല ചുമതലകളും തികഞ്ഞ ഉത്തരവാദിത്വത്തോടെ നിർവഹിച്ചിരുന്ന മികച്ച ഉദ്യോഗസ്ഥനാണ് അദ്ദേഹം. വിരമിച്ച ശേഷവും കേരളത്തിൽ തുടരുമെന്നാണ് ഋഷിരാജ് സിങ് അറിയിച്ചിട്ടുള്ളത്.

രാജസ്ഥാൻ സ്വദേശിയായ ഋഷിരാജ് സിങ് 1985 ബാച്ച് ഐപിഎസ് ഉദ്യോഗസ്ഥനാണ്. 24-ാം വയസിലാണ് അദ്ദേഹം കേരളത്തിൽ എത്തുന്നത്. സിബിഐ ജോയിന്റ് ഡയറക്ടറായി മഹാരാഷ്ട്രയിലും ജോലി ചെയ്തു.