കൊറോണവൈറസ് ബാധ മൂലമുള്ള അതിർത്തി നിയന്ത്രണങ്ങൾ വിദേശത്ത് സ്ഥിരതാമസമാക്കിയ ഓസ്‌ട്രേലിയക്കാർക്ക് കൂടി ബാധകമാക്കാൻ സർക്കാർ തീരുമാനിച്ചത് അടുത്തിടെയാണ്. ഇന്ന് മുതൽ യാത്ര നിയമങ്ങൾ കർശനമാക്കിയിരിക്കുകയാണ്.വിദേശത്ത് താമസിക്കുന്ന ഓസ്‌ട്രേലിയൻ പൗരന്മാർക്ക് രാജ്യം വിടാൻ അനുമതി ആവശ്യമാണെന്നാണ് പുതിയ നിയമം.കോവിഡ് -19 പകരുന്നത് തടയാൻ സഹായിക്കുന്ന അടിയന്തര ബയോസെക്യൂരിറ്റി നിയമങ്ങളുടെ ഭാഗമാണ് ഈ മാറ്റം .

അതായത് രാജ്യം വിടാൻ ആഗ്രഹിക്കുന്ന ആർക്കും 'ഓസ്ട്രേലിയൻ പ്രദേശം വിട്ടുപോകേണ്ടതിന്റെ നിർബന്ധിത കാരണം' ഉണ്ടെന്ന് ബോർഡർ ഫോഴ്‌സ് കമ്മീഷണറോട് കാണിക്കേണ്ടതായി വരും.മുമ്പ്, വിദേശത്ത് താമസിക്കുന്ന ഓസ്‌ട്രേലിയക്കാരെ പോകാൻ അനുമതി ആവശ്യപ്പെടുന്നതിൽ നിന്ന് ഒഴിവാക്കിയിരുന്നു.

ഇപ്പോൾ, മടങ്ങിവരുന്ന ആർക്കും -ഒരു ഇളവിനുള്ള അടിസ്ഥാനം പാലിച്ചില്ലെങ്കിൽ, വീണ്ടും പോകാൻ യാന്ത്രികമായി അനുമതി നൽകില്ല.അതായത് വിദേശ ഡ്രൈവിങ് ലൈസൻസ്, കരാർ, ഒരു തൊഴിലുടമയുടെ കത്ത് എന്നിവയുൾപ്പെടെയുള്ള രേഖകളിലൂടെ അവർക്ക് വിദേശത്ത് 'സ്ഥാപിതമായതും സ്ഥിരതാമസമാക്കിയതുമായ' വീട് ഉണ്ടെന്ന് തെളിയച്ചാൽ മാത്രം യാത്രക്ക് അനുമതി ലഭ്യമാകും

കൊറോണവൈറസ് ബാധ കാരണം 2020 മാർച്ച് മുതൽ ഓസ്‌ട്രേലിയക്കാരുടെ വിദേശയാത്ര നിരോധിച്ചിരിക്കുകയാണ്.ഫെഡറൽ സർക്കാരിന്റെ പ്രത്യേക അനുമതിയുണ്ടെങ്കിൽ മാത്രമേ ഓസ്‌ട്രേലിയൻ പൗരന്മാർക്കും പെർമനന്റ് റെസിഡന്റ്‌സിനും വിദേശത്തേക്ക് പോകാൻ കഴിയൂ.എന്നാൽ, പതിവായി വിദേശത്ത് ജീവിക്കുന്ന ഓസ്‌ട്രേലിയൻ പൗരന്മാർക്കും പെർമനന്റ് റെസിഡന്റ്‌സിനും ഈ നിയന്ത്രണം ബാധകമല്ലായിരുന്നു. പ്രത്യേക അനുമതിയൊന്നും കൂടാതെ തന്നെ സ്ഥിരതാമസമാക്കിയ രാജ്യത്തേക്ക് പോകാൻ അവർക്ക് കഴിയുമായിരുന്നു.

മറ്റൊരു രാജ്യത്താണ് സ്ഥിരമായി താമസിക്കുന്നത് എന്ന് തെളിയിച്ചാൽ മാത്രം മതിയായിരുന്നു.ഇതിലാണ് ഫെഡറൽ സർക്കാർ ഇപ്പോൾ മാറ്റം വരുത്തിയിരിക്കുന്നത്.വ്യാഴാഴ്ച പാർലമെന്റിൽ അവതരിപ്പിച്ച ഭേദഗതിയിലൂടെയാണ് സർക്കാർ ആരോഗ്യ ഉത്തരവിൽ മാറ്റം വരുത്തിയത്. ഇതോടെ ഈ വിഭാഗത്തിലുള്ള ഓസ്‌ട്രേലിയക്കാർക്കും രാജ്യാന്തര യാത്രാ വിലക്ക് ബാധകമാകും.

ഒഴിവാക്കാനാകാത്ത സാഹചര്യമുണ്ട് എന്ന് തെളിയിച്ചാൽ മാത്രമേ വിദേശത്ത് ജീവിക്കുന്ന ഓസ്‌ട്രേലിയക്കാർക്കും ഇനി മുതൽ ഓസ്‌ട്രേലിയയിൽ നിന്ന് പുറത്തേക്ക് പോകാൻ കഴിയൂ.

അതിർത്തി നിയന്ത്രണങ്ങൾ