ആശംസകളുമായി ശ്രീജേഷിന്റെ വീട്ടിൽ മമ്മൂട്ടി എത്തി; 'ഒളിംപിക്‌സിൽ പോലും എനിക്കു വിറയൽ ഉണ്ടായിരുന്നില്ല' മമ്മൂട്ടിയെ കണ്ട് സന്തോഷം അടക്കാനാവാതെ ശ്രീജേഷ്

ടോക്കിയോ ഒളിംപിക്‌സിൽ വെങ്കല മെഡൽ നേടിയാണ് ഇന്ത്യൻ ഹോക്കി ടീം നാട്ടിൽ തിരിച്ചെത്തിയത്. ഇന്ത്യ മെഡൽ നേടിയപ്പോൾ കളിക്ക് ചുക്കാൻ പിടിച്ചത് മലയാളിയായ ശ്രീജേഷ് ആയിരുന്നു. കഴിഞ്ഞ ദിവസം പി.ആർ.ശ്രീജേഷിന്റെ വീട്ടിൽ അപ്രതീക്ഷിത അതിഥിയായി മമ്മൂട്ടി എത്തി. വ്യാഴാഴ്ച രാവിലെയാണ് മമ്മൂട്ടി അഭിനന്ദനങ്ങളുടെ പൂക്കൂടയുമായി ശ്രീജേഷിന്റെ കിഴക്കമ്പലം പള്ളിക്കരയിലെ വീട്ടിലെത്തിയത്.

പതിറ്റാണ്ടുകൾക്കു ശേഷം ഒളിംപിക്‌സ് മെഡൽ കേരളത്തിലെത്തിച്ച ശ്രീജേഷിന് ഹൃദയത്തിൽ തൊട്ട വാക്കുകളിലുള്ള പ്രശംസയായിരുന്നു മമ്മൂട്ടിയുടെ ആദ്യ സമ്മാനം. പിന്നെ പൂക്കൂട നൽകി. മമ്മൂട്ടിയെ കണ്ട് ശ്രീജേഷിനും കുടുംബത്തിനും സന്തോഷമാകുകയും ചെയ്തു. ഒളിംപിക്‌സ് മെഡൽ ശ്രീജേഷ് മമ്മൂട്ടിയെ കാണിച്ചു. 'ഒളിംപിക്‌സിൽ പോലും എനിക്കു വിറയൽ ഉണ്ടായിരുന്നില്ല' എന്നാണ് ശ്രീജേഷ് താരത്തെ കണ്ട ആഹ്ലാദത്തിൽ പറഞ്ഞത്. ശ്രീജേഷിന്റെ കുടുംബാംഗങ്ങളും അതിഥിയായെത്തിയ മമ്മൂട്ടിയെ കണ്ട സന്തോഷത്തിലായിരുന്നു. നിർമ്മാതാവ് ആന്റോ ജോസഫ്, പ്രൊഡക്ഷൻ കൺട്രോളർ ബാദുഷ എന്നിവരും മമ്മൂട്ടിക്കൊപ്പമുണ്ടായിരുന്നു.