തിരുവനന്തപുരം: ടെക്നോപാർക്കിൽ പ്രവർത്തിക്കുന്ന, യുകെ ആസ്ഥാനമായ ബഹുരാഷ്ട്ര സോഫ്റ്റ്‌വെയർ ടെസ്റ്റിങ് കമ്പനി ടെസ്റ്റ്ഹൗസ് 12,000 ചതുരശ്ര അടി ഓഫീസ് ഇടം കൂടി സ്വന്തമാക്കി. ഇതോടെ ടെക്നോപാർക്ക് ഫെയ്സ് ഒന്നിൽ കമ്പനിയുടെ ഓഫീസ് ഇടം 24,000 ചതുരശ്ര അടിയായി വർധിച്ചു. പ്രവർത്തനം വിപുലപ്പെടുത്തുന്നതിന്റെ ഭാഗമായി ഭാവിയിൽ പുതുതായി 500 പേർക്കു കൂടി ഇവിടെ ജോലി ലഭിക്കും. വളരെവേഗം വളരുന്ന കമ്പനി ഈ വർഷം ആഗോള തലത്തിൽ ഏറ്റവും കുടുതൽ ജീവനക്കാരെ നിയമിച്ചത് ഇന്ത്യയിലാണ്. ഇന്ത്യയിൽ ടെക്നോപാർക്കിലാണ് ആസ്ഥാനം. ബെംഗളുരുവിലും ഗ്ലോബൽ ഡെലിവറി സെന്റർ ഉണ്ട്. മികച്ച സോഫ്റ്റ്‌വെയർ ടെസ്റ്റിങ് രംഗത്തെ മൂന്ന് രാജ്യാന്തര പുരസ്‌കാരങ്ങളും കമ്പനി ഈയിടെ സ്വന്തമാക്കിയിരുന്നു.

'കഴിഞ്ഞ ഏതാനും വർഷങ്ങളായി മികച്ച വളർച്ചയുടെ പാതയിലാണ് ടെസ്റ്റ്ഹൗസ്. ഈ വളർച്ചയ്ക്ക് ലോക്ഡൗൺ പോലും ഭീഷണിയായിട്ടില്ല. പ്രവർത്തനം വിപുലപ്പെടുത്തുന്നതിന്റെ ഭാഗമായി ഓഫീസ് ഇടം ഇരട്ടിപ്പിച്ച് കൂടുതൽ പേർക്ക് ജോലി നൽകാനും സാങ്കേതിക വിഭവങ്ങളൊരുക്കാനുമാണ് പദ്ധതി. മഹാമാരി കാരണം നിലവിൽ കൂടുതൽ ജീവനക്കാരും ജോലി ചെയ്യുന്നത് വീട്ടിലിരുന്നാണെങ്കിലും സാഹചര്യങ്ങൾ സാധാരണ നിലയിലാകുന്നതോടെ എല്ലാവരേയും ഉൾക്കൊള്ളാനുള്ള വികസനമാണ് നടത്തിയിട്ടുള്ളത്,' ടെസ്റ്റ്ഹൗസ് ഏഷ്യാപസഫിക്, മിഡിൽ ഈസ്റ്റ്, ആഫ്രിക്ക സിഇഒ രാജേഷ് നാരായൺ പറഞ്ഞു.

കൂടുതൽ തൊഴിലവസരങ്ങൾ സൃഷ്ടിക്കുന്നതിനും ആഗോള തലത്തിൽ റിക്രൂട്ട്മെന്റുകൾക്ക് നേതൃത്വം നൽകുന്നതിനും കമ്പനി മുൻനിര എച് ആർ വിദഗ്ധനായ അജിത് കുമാറിനെ കമ്പനിയുടെ ചീഫ് ഹ്യൂമൻ റിസോഴ്സസ് ഓഫീസറായി നിയമിച്ചു. ആഗോള തലത്തിലും കമ്പനിക്ക് പുതിയ വികസന പദ്ധതികളുണ്ട്. ന്യൂയോർക്കിൽ ഈയിടെ കമ്പനി പുതിയ ഓഫീസ് തുറന്നിരുന്നു. ഇനി ഒസ്ട്രേലിയയിലും പ്രവർത്തനം വിപുലപ്പെടുത്താനാണു പദ്ധതി. 20ലേറെ രാജ്യങ്ങളിലായി ഫോർച്യൂൺ 500 കമ്പനികൾ ഉൾപ്പെടെ 275 കമ്പനികൾക്ക് ടെസ്റ്റ്ഹൗസ് സേവനം നൽകുന്നുണ്ട്. യുകെ, യുഎസ്, മിഡിൽ ഈസ്റ്റ്, ആഫ്രിക്ക, ഇന്ത്യ, ഓസ്‌ട്രേലിയ എന്നീ രാജ്യങ്ങളിൽ ടെസ്റ്റ്ഹൗസിന് ശക്തമായ സാന്നിധ്യമുണ്ട്. നെക്സ്റ്റ് ജെനറേഷൻ ടെസ്റ്റിങ്, എഐ ടെസ്റ്റിങ്, ഐഒടി, യുഐ/യുഎക്‌സ് ടെസ്റ്റിങ് എന്നീ മേഖലകളിലാണ് ടെസ്റ്റ്ഹൗസ് ഇപ്പോൾ ശ്രദ്ധയൂന്നുന്നത്.

 

ടെസ്റ്റ്ഹൗസ്