സ്വാതന്ത്ര്യപൂർവ്വ കാലഘട്ടത്തിൽ ജനിച്ചുവളർന്ന തന്നെപ്പോലുള്ളവർക്ക് സ്വാതന്ത്ര്യം മഹത്തായ ആശയവും മനോഹരമായ മോഹവും; സ്വാതന്ത്ര്യ ദിനാശംസകൾ നേർന്ന് വി എസ്

തിരുവനന്തപുരം: സ്വാതന്ത്ര്യദിനാശംസകൾ നേർന്ന് മുതിർന്ന സിപിഐഎം നേതാവ് വി എസ് അച്യുതാനന്ദൻ. സ്വാതന്ത്ര്യപൂർവ്വ കാലഘട്ടത്തിൽ ജനിച്ചുവളർന്ന തന്നെപ്പോലുള്ളവർക്ക് സ്വാതന്ത്ര്യം ഒരു മഹത്തായ ആശയവും മനോഹരമായ മോഹവുമാണെന്നും അതാണ്, പാരതന്ത്ര്യത്തിനെതിരെ പോരാടാൻ ലഭിച്ച ഊർജമെന്നും വി എസ് ആശംസസന്ദേശത്തിൽ പറഞ്ഞു.

വി എസ് പറഞ്ഞത്: ''സ്വാതന്ത്ര്യപൂർവ്വ കാലഘട്ടത്തിൽ ജനിച്ചുവളർന്ന എന്നെപ്പോലുള്ളവർക്ക് സ്വാതന്ത്ര്യം ഒരു മഹത്തായ ആശയവും മനോഹരമായ മോഹവുമാണ്. അതാണ്, പാരതന്ത്ര്യത്തിനെതിരെ പോരാടാൻ ഞങ്ങൾക്ക് ലഭിച്ച ഊർജം. സ്വാതന്ത്ര്യത്തെയും പാരതന്ത്ര്യത്തെയും അസ്വാതന്ത്ര്യത്തെയും വേർതിരിച്ചറിയാനാവാത്തവരെ സംബന്ധിച്ച് സ്വാതന്ത്ര്യം എന്ന ത്രൈയ ക്ഷരി കേവലം ഒരു ആലങ്കാരിക പ്രയോഗം മാത്രമായിരിക്കും. എന്നാൽ, പൊരുതി നേടിയ സ്വാതന്ത്ര്യത്തെ അതിന്റെ അറിവിലും അർത്ഥത്തിലും ഉൾക്കൊള്ളുന്ന സകലമാന ജനതതികൾക്കും എന്റെ സ്വാതന്ത്ര്യദിനാശംസകൾ.''