ജോലി വാഗ്ദാനം ചെയ്ത് വിളിച്ചു വരുത്തി; ലഹരിമരുന്നു കലർത്തിയ ശീതളപാനീയം നൽകി കാറിൽ കൂട്ടപീഡനം: നാലു പേർ അറസ്റ്റിൽ

ചെന്നൈ: ജോലി വാഗ്ദാനം ചെയ്ത് വിളിച്ചു വരുത്തിയ ശേഷം 20കാരിയെ കാറിൽ കൂട്ടബലാത്സംഗത്തിന് ഇരയാക്കി. ലഹരിമരുന്നു കലർത്തിയ ശീതളപാനീയം നൽകി ബോധരഹിതയാക്കിയ ശേഷം യുവതിയെ കാറിൽ കൂട്ടപീഡനത്തിനിരയാക്കുക ആയിരുന്നു. സംഭവത്തിൽ നാലു പേരെ അറസ്റ്റ് ചെയ്തു. കാഞ്ചീപുരം ജില്ലയിലെ മേൽകതിപൂരിലാണു സംഭവം.

സമൂഹമാധ്യമം വഴി പരിചയപ്പെട്ട ഗുണശീലൻ (24) ആണ് 20 വയസ്സുകാരിയെ ജോലി വാഗ്ദാനം ചെയ്തു വിളിച്ചു വരുത്തിയത്. ഇയാളും സുഹൃത്തുക്കളായ ജബനേശൻ (29), അജിത് (23), കാമരാജ് (25) എന്നിവരുമാണു പിടിയിലായത്. ഒരാൾ ഒളിവിലാണ്. യുവതി കാറിന്റെ ഗ്ലാസ് തകർത്ത് അലറി വിളിച്ചപ്പോൾ നാട്ടുകാർ ഓടിയെത്തി. ഇതോടെ, യുവതിയെ റോഡിൽ ഉപേക്ഷിച്ചു സംഘം കടന്നു.