കുവൈറ്റ് സിറ്റി. കുവൈറ്റിലെ ആരോഗ്യ മന്ത്രാലയത്തിന് കീഴിലുള്ള ഇബിൻസിനാ ആശുപത്രിയിൽ രണ്ടാഴ്ചിലധികമായി ചികിത്സയിലുള്ള കുട്ടിക്ക് അടിന്തിര ശസ്ത്രക്രിയക്കായി അപൂർവ്വ രക്തഗ്രൂപ്പിൽ പെട്ട ബോംബെ രക്തദാനം ജാബ്രിയ സെൻട്രൽ ബ്ലഡ് ബാങ്കിൽ നടന്നു. ബിഡികെ കുവൈറ്റിന്റെ രക്തദാനസേനിലെ അംഗവും മംഗലാപുരം സ്വദേശിനിയുമായ വിനുത ദയാനന്ദയാണ് രക്തം ദാനം ചെയ്തത്. രണ്ടാഴ്ചത്തെ തയ്യാറെടുപ്പിലൂടെയാണ് രക്തദാനത്തിനാവശ്യമായ ഹീമോഗ്ലോബിൻ നില വിനുത ആർജ്ജിച്ചത്.

സെപ്റ്റംബർ രണ്ടാം വാരത്തിൽ പ്രസ്തുത രോഗിക്ക് രക്തം ആവശ്യമായി വന്നപ്പോൾ കുവൈറ്റ് ബ്ലഡ് ബാങ്കധികൃതർ ബിഡികെ പ്രതിനിധികളെ ബന്ധപ്പെടുകയും തുടർന്ന് രക്തദാതാനത്തിനാവശ്യമായ മുന്നൊരുക്കങ്ങൾ നടത്തുകയുമായിരുന്നു.റോയൽ ഹയാത്ത് ഹോസ്പിറ്റലിലെ ടെക്‌നീഷ്യനായ വിനുത സ്വന്തം ജോലിത്തിരക്കിനിടയിലും ഭർത്താവിനൊപ്പം രാവിലെ തന്നെ രക്തദാനത്തിനായി എത്തുകയായിരുന്നു.2017 ൽ വിനുതയുടെ പ്രസവ ശസ്ത്രക്രിയക്കായി ബിഡികെ പ്രവർത്തകർ ഖത്തറിൽ നിന്നും നിധീഷ് രഘുനാഥ് എന്ന ബോംബെ ഗ്രൂപ്പ് ദാതാവിനെ എത്തിച്ച് രക്തദാനം നടത്തിയിരുന്നു.

അടിയന്തിര സാഹചര്യത്തിൽ രക്തദാനത്തിന്റെ പ്രാധാന്യം ഉൾക്കൊണ്ട് മുന്നോട്ടു വന്ന വിനുതയെ ബ്ലഡ് ബാങ്ക് അധികൃതർ ആദരിച്ചു.1952-ൽ മുംബയിൽ ഡോ. ഭെൻഡേയാണ് ഈ രക്തഗ്രൂപ്പ് ആദ്യമായി തിരിച്ചറിഞ്ഞത്. മഹാരാഷ്ട്രയിലും അതിനോടു ചേർന്ന കർണ്ണാടകയുടെ ചില പ്രദേശങ്ങളിലുമാണ് ബോംബേ ഓ പോസിറ്റീവ് രക്തം ഉള്ളവരെ കൂടുതലായി തിരിച്ചറിഞ്ഞിട്ടുള്ളത്. അതിനാലാണ് ഈ രക്തഗ്രൂപ്പിന് ബോംബേ ഗ്രൂപ്പ് എന്ന പേരു വരാൻ കാരണം.10ലക്ഷം ആളുകൾക്ക് ഇടയിൽ 4 പേർക്കാണ് ഈ ബ്ലഡ് ഗ്രൂപ്പ് കാണുക എന്നാണ് റിപ്പോർട്ട്.

 

ബോംബെ രക്തദാനം