നവകേരള പോസ്റ്റ് ഡോക്ടറൽ ഫെലോഷിപ്പ്; അപേക്ഷ ക്ഷണിച്ചു
തിരുവനന്തപുരം: നവകേരള പോസ്റ്റ് ഡോക്ടറൽ ഫെലോഷിപ്പുകൾക്ക് അപേക്ഷകൾ ക്ഷണിച്ചു. സംസ്ഥാന സർക്കാർ ഇത്തവണത്തെ ബജറ്റിൽ പ്രഖ്യാപിച്ച ഫെലോഷിപ്പ് പ്രകാരം പ്രതിമാസം അമ്പതിനായിരം മുതൽ ഒരു ലക്ഷം രൂപവരെ രണ്ട് വർഷത്തേക്കാണ് ഫെലോഷിപ്പ്.
കൃഷി, ജൈവവൈവിധ്യം, ഡിജിറ്റൽ സാങ്കേതികത, ജനിറ്റിക്സ്, കാലാവസ്ഥാ വ്യതിയാനം, കേരളത്തിലെ തനത് സംസ്‌കാരം എന്നീ മേഖലകളിലെ ഗവേഷണത്തിനാണ് ഫെലോഷിപ്പ്. അപേക്ഷകർ ഡോക്ടറേറ്റ് നേടിയിട്ടുള്ള കേരളീയർ ആയിരിക്കണം. ഉയർന്ന പ്രായപരിധി നാൽപത് വയസ്സാണ്.
സ്ത്രീകൾക്കും അർഹതപ്പെട്ട മറ്റ് വിഭാഗങ്ങൾക്കും അഞ്ച് വർഷം ഇളവ് ലഭിക്കും. കേരളത്തിലെ ഏതെങ്കിലും ഒരു സർവകലാശാല കേന്ദ്രത്തിൽ ആയിരിക്കണം ഗവേഷണം. സർക്കാർ അംഗീകൃത സ്ഥാപനത്തിൽ സ്ഥിര ജോലിയുള്ള വ്യക്തിയെയാണ് ഗവേഷകൻ മെന്റർ ആയി തിരഞ്ഞെടുക്കേണ്ടത്.
അപേക്ഷകൾ ലഭിക്കേണ്ട അവസാന തീയതി ഒക്ടോബർ 20. കൂടുതൽ വിവരങ്ങൾക്ക് ഉന്നത വിദ്യാഭ്യാസ കൗൺസിൽ വെബ്സൈറ്റ് സന്ദർശിക്കുക. (www.kshec.kerala.gov.in) ഓൺലൈൻ അപേക്ഷകൾ സമർപ്പിക്കുന്നതിന് http://159.89.167.203/kshecportal /public/index.php/navakerala-fellowship സന്ദർശിക്കണം.
