ചുരു: ഗൃഹപാഠം ചെയ്യാത്തതിന് അദ്ധ്യാപകൻ ക്രൂരമായി മർദ്ദിച്ച ഏഴാം ക്ലാസ്സുകാരൻ അതിദാരുണമായി മരിച്ചു. രാജസ്ഥാനിലെ ചുരു ജില്ലയിലെ സലാസർ ഗ്രാമത്തിലെ സ്വകാര്യ സ്‌കൂളിലാണ് സംഭവം. പതിമ്മൂന്നുകാരനായ ഗണേശാണ് കൊല്ലപ്പെട്ടത്. ഗൃഹപാഠം ചെയ്യാതെ സ്‌കൂളിലെത്തിയ കുട്ടിയെ അദ്ധ്യാപകൻ യാതൊരു ദയയുമില്ലാതെ ക്രൂരമായി മർദ്ദിക്കുക ആയിരുന്നു.

വിദ്യാർത്ഥിയുടെ അച്ഛൻ ഓംപ്രകാശിന്റെ പരാതിയുടെ അടിസ്ഥാനത്തിൽ അദ്ധ്യാപകൻ മനോജിനെതിരേ കേസെടുത്തതായി സലാസർ എസ്.എച്ച്.ഒ. സന്ദീപ് വിഷ്‌നോയ് പറഞ്ഞു. ബുധനാഴ്ച രാവിലെയാണ് സംഭവം. ഗണേശ് ഗൃഹപാഠംചെയ്തില്ലെന്നാണ് മനോജ് ആദ്യം അച്ഛനെ വിളിച്ചറിയിച്ചത്. പിന്നീട് കുട്ടി അബോധാവസ്ഥയിലാണെന്നുപറഞ്ഞ് വീണ്ടും വിളിച്ചു. അബോധാവസ്ഥയിലായ കുട്ടിയെ ആശുപത്രിയിലെത്തിച്ചെങ്കിലും രക്ഷിക്കാനായില്ല. പോസ്റ്റ്‌മോർട്ടം നടപടികൾക്കുശേഷം വ്യാഴാഴ്ച മൃതദേഹം സംസ്‌കരിച്ചു.

 

ഏഴാം ക്ലാസുകാരൻദാരുണ മരണം