രാജസ്ഥാനിൽ കോളജ് വിദ്യാർത്ഥിനി വനത്തിനുള്ളിൽ മരിച്ചനിലയിൽ; പരിക്കേറ്റ പാടുകൾ

ജയ്പൂർ: രാജസ്ഥാനിൽ കോളജ് വിദ്യാർത്ഥിനിയെ വനത്തിനുള്ളിൽ മരിച്ചനിലയിൽ കണ്ടെത്തി. കൊലപാതകത്തിന് മുൻപ് വിദ്യാർത്ഥിനി ബലാത്സംഗത്തിനും ഇരയായതായി പൊലീസ് സംശയിക്കുന്നു. മൃതദേഹത്തിൽ പരിക്കേറ്റ പാടുകളുണ്ട്.

പുഷ്‌കറിലാണ് സംഭവം. കഴിഞ്ഞ വ്യാഴാഴ്ച പെൺകുട്ടിയെ കാണാനില്ലെന്ന് കാണിച്ച് മാതാപിതാക്കൾ പൊലീസിൽ പരാതി നൽകിയിരുന്നു. അന്വേഷണത്തിനിടെയാണ് പെൺകുട്ടിയെ മരിച്ചനിലയിൽ കണ്ടെത്തിയത്.

ശരീരത്തിൽ മുറിവേറ്റ പാടുകളുണ്ട്. ദേഹോപദ്രവം ഏൽപ്പിച്ച ശേഷമാണ് കൊലപാതകം നടത്തിയതെന്നാണ് പ്രാഥമിക നിഗമനം. കൊലപാതകത്തിന് മുൻപ് പെൺകുട്ടിയെ ബലാത്സംഗം ചെയ്തതായും സംശയിക്കുന്നതായി പൊലീസ് പറയുന്നു. പോസ്റ്റ്മോർട്ടത്തിന് ശേഷം മാത്രമേ ഇക്കാര്യം സ്ഥിരീകരിക്കാൻ സാധിക്കൂ. അന്വേഷണം പുരോഗമിക്കുന്നതായും പ്രതികളെ ഉടനടി പിടികൂടുമെന്നും പൊലീസ് അറിയിച്ചു.