ദോഹ: യൂത്ത് ഫോറം ഖത്തർ സംഘടിപ്പിക്കുന്ന 'നാം കരുത്തരാവുക, കരുതലാവുക' കാമ്പയിന്റെ ഭാഗമായുള്ള സോഷ്യൽ മീഡിയ ഇൻഫ്‌ളുവൻസേഴ്‌സ് മീറ്റ് നാളെ നടക്കും.

മതാർ ഖദീമിലെ യൂത്ത് ഫോറം ഓഫീസ് ആസ്ഥാനത്ത് നടക്കുന്ന പരിപാടിയിൽ ക്യു എഫ് എം റേഡിയോ നെറ്റവർക്ക് സിഇഒ അൻവർ ഹുസൈൻ മുഖ്യ അതിഥിയായി പങ്കെടുക്കും. ഖത്തറിലെ സാമൂഹിക മാധ്യമങ്ങളിൽ സജീവമായി ഇടപെടുന്നവരെ ഉൾപ്പെടുത്തി സംഘടിപ്പിക്കുന്ന സംഗമം ഉച്ചയോടെ ആരംഭിക്കും.

വെറുപ്പുൽപ്പാദനത്തിനും വിദ്വേഷ പ്രചാരണങ്ങൾക്കുമായി സാമൂഹിക മാധ്യമങ്ങളെ ദുരുപയോഗം ചെയ്യുന്ന സാഹചര്യത്തിൽ, സൗഹൃദത്തിലും സഹിഷ്ണുതയിലും സാഹോദര്യത്തിലുമൂന്നിയുള്ള സാമൂഹിക മാധ്യമ ആക്ടിവിസത്തിന് പ്രചോദനമാവുകയെന്ന ഉദ്ദേശ്യത്തോടെയാണ് സംഗമം സംഘടിപ്പിക്കുന്നത്.

ഖത്തറിലെ മലയാളി യുവ സമൂഹത്തിനിടയിലെ സജീവ സാന്നിദ്ധ്യമായ യൂത്ത് ഫോറം സംഘടിപ്പിക്കുന്ന 'നാം കരുത്തരാവുക, കരുതലാവുക' എന്ന പ്രമേയത്തിലൂന്നിയുള്ള കാമ്പയിൻ നവംബർ 15ന് അവസാനിക്കും.

യൂത്ത് ഫോറം ഖത്തർ