സൗദിയിലെ മലയാളികളുടെ വധശിക്ഷ ശരിവച്ച് അപ്പീൽ കോടതി; ഇന്ത്യൻ എംബസി മുഖേന ദയാഹർജി നൽകാനൊരുങ്ങി പ്രതികളുടെ കുടുംബങ്ങൾ: ദയാഹർജി ഫലം കാണാൻ കൊല്ലപ്പെട്ട സമീറിന്റെ കുടുംബത്തിന്റെ കാരുണ്യം കാത്ത് പ്രതികൾ

ദമാം: കോഴിക്കോട് കൊടുവള്ളി സ്വദേശി കൊല്ലപ്പെട്ട കേസിൽ ജയിലിൽ കഴിയുന്ന സൗദിയിലെ രണ്ട് മലയാളികളുടെ വധശിക്ഷ ശരിവച്ച് അപ്പീൽ കോടതി. മുക്കിലങ്ങാടി വേലാട്ടുകുഴിയിൽ സമീർ സൗദിയിൽ കൊല്ലപ്പെട്ട കേസിൽ രണ്ട് മലയാളികൾക്ക് വിധിച്ച വധശിക്ഷയാണ് അപ്പീൽ കോടതി ശരിവച്ചത്. മലയാളികളെ കൂടാതെ കേസിലുൾപ്പെട്ട മറ്റ് നാലു പേർക്ക് കൂടി ദമാം ക്രിമിനൽ കോടതി വധശിക്ഷ വിധിച്ചിട്ടുണ്ട്.

തൃശൂർ കൊടുങ്ങല്ലൂർ ഏറിയാട് ചീനികപ്പുറത്ത് നിസാം സാദിഖ് (നിസാമുദ്ദീൻ), കുറ്റ്യാടി സ്വദേശി ആശാരിത്തൊടിക അജ്മൽ ഹമീദ്, സൗദി പൗരന്മാരായ ഹുസൈൻ, അസ്വദ്, ഇദ്രീസ് (അബു റവാൻ), അലി എന്നിവർക്കാണ് വധശിക്ഷ. 5 വർഷം മുൻപ് ജുബൈലിലെ വർക് ഷോപ്പ് മേഖലയിലെ മാലിന്യത്തൊട്ടിക്കു സമീപം സമീറിന്റെ മൃതദേഹം കണ്ടെത്തുകയായിരുന്നു. പിന്നീട് നടത്തിയ അന്വേഷണത്തിൽ മലയാളികളടക്കമുള്ള സംഘം സമീറിനെ കൊലപ്പടുത്തുകയായിരുന്നെന്ന് തെളിഞ്ഞു.

ഹവാല ഏജന്റായിരുന്ന സമീറിനെ സ്വദേശി പൗരന്മാർ തട്ടിക്കൊണ്ടുപോയി 3 ദിവസം ബന്ദിയാക്കിയെങ്കിലും പണം ലഭിക്കാത്തതിനെ തുടർന്നുള്ള മർദനത്തിൽ കൊല്ലപ്പെടുകയായിരുന്നു എന്നാണു നിഗമനം. സംഘത്തിന് ആവശ്യമായ വിവരങ്ങൾ നൽകിയത് നിസാമും അജ്മലുമായിരുന്നുവെന്ന് പൊലീസ് കണ്ടെത്തി.

അപ്പീൽക്കോടതി വിധിയുടെ പശ്ചാത്തലത്തിൽ ഇന്ത്യൻ എംബസി മുഖേന സൗദി ഭരണാധികാരിക്കു ദയാഹർജി നൽകാനുള്ള ഒരുക്കത്തിലാണ് പ്രതികളുടെ കുടുംബാംഗങ്ങൾ. എന്നാൽ ഭാര്യയും 2 ചെറിയ കുട്ടികളുമടങ്ങുന്ന സമീറിന്റെ കുടുംബം മാപ്പ് നൽകാൻ തയാറായാൽ മാത്രമേ ദയാഹർജി ഫലം കാണൂ.