ഒമാനിലെ ആശുപത്രികളിൽ ഇനി ആറ് കോവിഡ് രോഗികൾ മാത്രം

മസ്‌കത്ത്: ഒമാനിലെ ആശുപത്രികളിൽ കോവിഡ് ബാധിച്ച് ചികിത്സയിലുള്ളത് ഇനി ആറ് രോഗികൾ മാത്രം. ഇവരിൽ നാല് പേരുടെ നില ഗുരുതരമായതിനാൽ അവർ തീവ്ര പരിചരണ വിഭാഗങ്ങളിലാണ്. കഴിഞ്ഞ 24 മണിക്കൂറിനിടെ രാജ്യത്ത് ഒരു കോവിഡ് രോഗിയെ മാത്രമാണ് ആശുപത്രിയിൽ പ്രവേശിപ്പിക്കേണ്ടി വന്നത്.

രാജ്യത്ത് പുതിയതായി എട്ട് പേർക്ക് കൂടി കോവിഡ് വൈറസ് ബാധ സ്ഥിരീകരിച്ചുവെന്ന് ആരോഗ്യ മന്ത്രാലയം അറിയിച്ചു. അതേസമയം തന്നെ രോഗമുക്തരായവരുടെ എണ്ണം 220 ആണ്. ദിവസങ്ങളായി രാജ്യത്ത് പുതിയ കോവിഡ് മരണങ്ങളൊന്നും റിപ്പോർട്ട് ചെയ്യപ്പെട്ടിട്ടില്ല.

ഇതുവരെയുള്ള കണക്കുകൾ പ്രകാരം ആകെ 3,04,299 പേർക്ക് ഒമാനിൽ കോവിഡ് സ്ഥിരീകരിച്ചിട്ടുണ്ട്. ഇവരിൽ 2,99,654 പേരും ഇതിനോടകം രോഗമുക്തരാവുകയും ചെയ്തു. 4111 പേർക്ക് ഒമാനിൽ കോവിഡ് കാരണം ജീവൻ നഷ്ടമായി. നിലവിൽ 534 കോവിഡ് രോഗികൾ രാജ്യത്തുണ്ട്. നിലവിൽ 98.5 ശതമാനമാണ് രാജ്യത്തെ കോവിഡ് രോഗമുക്തി നിരക്ക്.